Dawa ka AJMW&LU ban siew tulop 10 tarik namar ka Behdeiñkhlam

Ka seng All Jaiñtia Muster Roll & Labour Union lyngba u Advicer jong ka u Khroo Lamsalanki Pariat lem bad ki dkhot hynne ka sngi ki la mih shakhmat ban kyrpad ia u myntri rangbah ka Jylla u Conrad Sangma bad u Symbud myntri rangbah u Sñiawbhalang Dhar bad ia u Commisioner Secretary ka tnat finance u Dr Vijay Kumar ba kin sngewbha ban siew ia ka tulob ki nongtrei muster roll hapoh 10 tarik mynta u bnai, khamtam ba une u bnai dei u bnai lehkmen Behdeiñkhlam hapoh ka Raij Jowai bad Tuber.Haba kren sha ki lad pathai khubor u Khroo Lamsalanki Pariat u ong ki jingshisha hi ka la don ka hukum na ka tnat finance ba la pynmih ha ka 7 tarik u bnai June 2022 kaba kren shai ba hapoh 10 tarik jong man u bnai dei ban siew tulob shaki nongtrei muster roll.

U ong naduh ba la pynmih ia katei ka hukum ka jingsiew tulob sha ki nongtrei muster roll ka poi beit hapoh 10 tarik man la u bnai, hynrei naduh u bnai October 2024 haduh mynta pat ki la sdang ban ioh tulob haki tarik ba 20 shaneng. Halor kane u ong ymtip shuh iano yn kynnoh, namar hapoh 2 snem ka iaid beit katkum ka hukum ba la pynmih ka sorkar mynta pat kam iaid shuh.

Kumta ki kyntu jur iaka sorkar ban pyllait iaka tulip hashwa ka 10 tarik mynta u bnai khnang ba napdeng kiba trei muster roll kiba dang dei Niamtre kin ioh pisa ban pynkmen iaki khun ki kti bad ka ïing ka sem. Ha kajuh ka por ki kyrpad ruh iaka sorkar ban siew dep noh iaka bainong basic rate ba dang sahteng haduh mynta kaba la poi sha 21 tylli ki bnai.