Lap ka HYC ba kit masi ka kali kompani, dawa ban leh tyngeh ia ki nongkhaii masi beain

Ka Hynniewtrep Youth Council (HYC) ka la dawa ban leh tyngeh pyrshah ia ki briew ba shah kynnoh wan khaii beain ia ki Masi shapoh ka jylla Meghalaya. Ha ka dorkhas ba la aiti sha u Director jong ka tnad Animal Husbandry & Veterinary, u President ka HYC h Bah Roykupar Synrem, u la kyntu ia ka tnad ba ka dei ban pyntikna ba ia ki mard ne ki Masi kiba kit ne khaii hapoh ka jylla, ki dei ban bud ryntih ia ki ain ki katkum Standard Operating Procedures (SOPs).

U Bah Roy ula pyntip ba ha ka 30 tarik Jylliew, ki dkhot ka HYC ki la ioh bat ia kawei ka mini truck ba don number AS 01 RC 7779 ha Anti-Infiltration Check-gate kaba don ha Byrnihat, Ri Bhoi District. “Kane ka kali, ba la kynnoh ba pyndonkam da ka courier service company, ka la kit haduh 9 tylli ki masi khlem da don ki kot ki sla ba biang ha ba kit na kawei ka jylla sha kawei pat” la ong ka HYC. Ka HYC ka la pynpaw nalor kata, ia ki masi ba kit ha kane ka kali ym shym la don satia ban pynshisha na ki bor ba dei peit, la ki long ne em kiba bit ba biang ban bam doh ia ki.

U Bah Synrem u la ong, ka rukom kit ka long pyrshah ia ka ain na ka jingshah lehbein ki mrad, katkum ka Prevention of Cruelty to Animals Act, 1960, the Transport of Animals Rules, 1978 (as amended) bad ka Motor Vehicles Act, 1988.“Ngim lah ban sngewthuh ba kumno ka rukom la shah ban kit ia ki masi ne mrad shapoh ka jylla khlem da bud ryntih ia ki rukom jong ka ain…. kaba pynkhein ia ka Prevention of Cruelty to Animals Act, 1960 and the Transport of Animals Rules, 1978 (as amended) bad kumjuh ruh ia ki kyndon jong Motor Vehicles Act, 1988,” ong u Bah Synrem haba bynrap ia ka jingdonkam ban pyrkhing bha bad ban bud ryntih ia ki ain ha kaba iadei bad ka jingkit bad khaii masi.