Plie u CM ia ka karkhana sain umsoh baheh tam ha Mendipathar

U Myntri Rangbah ka Jylla Conrad K Sangma hynne ka sngi, ula plie paidbah ia ka Bottling Plant jong ka Varun Beverages Limited (PepsiCo), ha Mendipathar, North Garo Hills kaba long kaba heh duh hapoh ka thain Shatei Lam Mihngi ia kaba la tei ha ka jaka kaba 37 akar bad ha ka jinglut jingsep kaba kot T.340 Klur.Haba kren ha ka jingialang u Myntri Rangbah ula ong “Kane ka project ka long ka jingkyrkhu ia ka jylla, namar kan plie lad ban ioh kam ioh jam bad ban ai jingmyntoi ia ki briew jong ka thain”.“Kane ka dei ka dak jong ka jingkiew jong ka ioh ka kot kaba ka Meghalaya ka la iaid ha ka lynti kaba dei, ban kynjoh ia ka thong. Ym don mano mano ruh ki ban poi pyrkhat bad ka Bottling Plant kaba heh duh kan don hangne ha Mendipathar” ong u Conrad bad ka bynrap, “Ki samla kin sa iohi ia ki kabu ba kane ka karkhana kan plie na ka bynta ka jongki. Ngi lah ban khmih lynti ba ki kabu ki bapher bapher kin sa mih ha ka thain”.U Myntri Rangbah ula iathuh ba ka Mendipathar Industrial Area ka dei kaba la wanrah naduh ki snem 1990 hynrei la palat 30 snem, ym shym la don satia kano kano ka jingseng kam.

“Ha ki 30 snem kiba la leit, kam shym la don satia ka jingmih jong kano kano ka karkhana. Kila don ki jingkyrmen bad jingkhmih lynti, ia kaba ym shym la lah ban pynurlong” ong u Conrad bad ka pynpaw ia ka jingsngewkhia ba u (L) PA. Sangma uba la iohi jngai ia ka Mendipathar kum ka enjin jong ka roi ka par na ka bynta ka rilum Garo.“Mynta ka sngi, kadei ka sngi jong ka jingkyrmen bad ka jingpynurlong ia ka jingiohi jngai u (PA Sangma) kaba ula don na ka bynta ka Mendipathar bad ia ka jylla Meghalaya baroh kawei” bynrap u Myntri Rangbah.U Conrad ula ai khublei ia ka jingnoh synniang jong ki Nokma bad ki paidbah ka Mendipathar ha ka ban noh synniang ia ka jaka ban seng ia ka Industrial Area ha ki 30 snem kiba la leit noh.U Myntri Rangbah ula ai khublei ruh ia u Chairman ka Varun Beverages Limited, u Ravikant Jaipuria bad ia u Varun Jaipuria, kiba la seng ia ka Bottling Plant kaba hehduh ha ka thain Shatei Lam Mihngi ka Ri.

Kane ka karkhana kan ai kam kumba 500 ngut ki nongtrei na ka bynta ban pynmih bad pynbiaid ia ki mar bapher jongka PepsiCo, kynthup ia ka jingpynmih ia ki umsoh ki bapher.U Myntri Rangbah ula kyntu ia ki paidbah ba kin shimkabu ia ki kam ba iadei bad ka ioh ka kot bad ka ong “Ki samla ki jong ngi kin ioh ia ki lad ki bapher bapher” bad ula pynbna ba yn sa seng sa ia kawei ka karkhana ha Tikrikilla Bajengdoba, ha kaba mynta 90% ki kam kidei kiba la dep. Ha kane ka jingplie ia kane ka karkhana la ia donlang u Symbud Lamphang ka iing dorbar thawain u Timothy D Shira, u Myntri ka tnad bording u AT Mondal, u Myntri ka tnad PHE u Marcuise Marak, u Chairman ka MIDC James K Sangma bad kiwei ki MLA.