T.240 klur mang ka sorkar ban kyntiew kam rep syntiew ha Jylla

Ban ialeh ban kyntiew ia ka kam rep ia ki syntiew ki skud, ka sorkar jylla ka la rai ban mang T.240 klur na ka bynta 3 snem ban pyniar bad pynkhlain ia ka jingpynmih ia ki syntiew kiba rem dor hapoh ka jylla. Ia katei la pynbna da u Myntri Rangbah ka Jylla u Conrad K. Sangma hynne ka sngi ha ka jingleit jurip ia ka shnong Mawkriah, kaba don ha Mylliem Constituency ha kaba la don lang ka Myntri ka rep ka riang ka Kong Ampareen Lyngdoh bad u MLA ka Mylliem u Bah Ronnie V Lyngdoh. U Conrad ula ong ba ka sorkar kala bhah T.240 Klur na ka bynta ki 3 snem ban wan, hapoh jongka Floriculture Mission 1.0, da ka jingthmu ban pynkylla ia ka jylla kum ka shlem kaban ialam ia ka kam pynmih ia ki syntiew ha ka thain shatei lammihngi bad ha ka ri India.

“Kane ka dei ka jingbei tyngka kaba heh tam kaba kano kano ka sorkar kan leh ha kaba iadei bad ka Floriculture ha Meghalaya. Ngi khmih lynti ba kan ai ia ka jingpynmih ia ka khajna kaba T.600 Klur lyngba kane ka mishon ha kine ki snem ban wan” la ong u Myntri Rangbah.Ula ong, ka jingthmu jong ka mishon ka long ban pynlong ia ka jingpynmih ia ki syntiew ki skud kaba don ia ka dor, kaba lah ban kyrda ia ka jinglong ka suiñbneng bad ban pynneh ia ka kamai kajih.La sdang ia kane ka mishon ha u bnai Lber 2024, da ka jingthmu ban ai jingmyntoi palat 3,000 ngut ki nongrep da kaba ai ia ka Subsidy kaba T.7 lak kaban kynthup ia ka jingthied ia ki jingdonkam, ki jingtei bad ka jingai jinghikai. Haduh mynta kumba 500 ngut ki nongrep kila ioh jingmyntoi na kane ka prokram bad ka phaikhmat ha kaban rep ia ki syntiew kiba rem kum ki Orchid kiba kynthup ia u Dendrobium, Cymbidium, Vanda bad Phalaenopsis bad ia ki Oriental Lilium, kiba kiba jur bha ka jingdawa hapoh ri India bad ha ki iew kiba don ha kylleng ka pyrthei.

Ka sorkar kan iatreilang bad ki artylli ki kynhun kiba kynthup iaka Darjeeling Gardens bad North Bengal Floritech – kiban ai jinghikai kyrpang, ki tiar ki tar ban rep ban riang, ka jingkyrshan ha kaba iadei bad ki jingtei bad ban pynioh ia ka jingkhaii pateng ha ki iew ki hat lyngba ka jingiapynbeit ban thied haduh 3 snem ia ki syntiew.Ula ong ruh ba ki syntiew kiba mih ha ka thain ki dei kiba la pynkhreh mynta ban sdang noh da ka buit jong ka jingrep da ka jingstad saian.Ula ong ba ka Floriculture Mission ka dei shibynta jongka jingiohi jngai ha kaba ia dei bad ka rep ka riang ha ka jylla, kaba kynthup ia ka jingseisoh ki prokram kum ka Lakadong Turmeric Mission, ha kaba ka jingpynmih ka la nang kiew na ka 1,000 Metric Ton sha palat ia ka 20,000 Metric Ton.