Ai jingmut ka sorkar ban pyndait CCTV bad kor ban record por pynlong Interview

Ka Kynhun Myntri ka Sorkar Jylla hynne ka sngi ka la pdiang ia ka kaiphod jong ka Meghalaya Public Service Commission Reforms Committee (MPSCRC), kaba thmu ban pynjanai ia ka rukom treikam, ka jingmih, ka jinglong khuid suba bad ba shai ha ka rukom pyniaid ia ka eksam thungkam ha Meghalaya Public Service Commission (MPSC).Ia kane ka kaiphod la aiti da ka Committee kaba la khlieh da u Principal Secretary Bah FR Kharkongor. Haba kren sha ki lad pathai khubor hadien ka jingïalang ka kynhun Myntri, u Myntri Rangbah ka u Conrad K Sangma ula ong, “Ka Committee ka la aiti ia ka kaiphod jong ka bad ngi la pdiang ia kane ka kaiphod kumba ka long ha ka jingialang ka Kynhun Myntri mynta ka sngi”.U Conrad ula pyntip ba ka Kynhun Myntri ka la ai jingmut ban pyndait ia ki kor CCTV bad ki kor ban record khnang ban pynthikna ia ka jingkhuid kaba shai ha ka por interview ban thung kam.

“Nalor kane (ki jingai jingmut ka Committee), ka Kynhun Myntri ka la ai jingmut ruh ban don ki kor CCTV bad ki kor recording ha ka por ba leh interview bad ki camera ki dei ban don khnang ba lada mih kino kino ki jingkylli ne ki kynrum kynram, yn lah ban peit bniah” ula ong haba kular ba ia kane ka kaiphod yn sa pyllait paidbah shen ban pynthikna ia ka jingtreikam kaba khuid ha ka rukom pyniaid ia ki eksam thungkam.Haba kren halor ki jingpynkylla ba kongsan, u Conrad ula ong ba ki don ki lynti kiba shipor, kiba katto katne snem bad kiba neh slem bala ai jingmut da ka Committee.Ka lynti ba shipor ka kynthup ia ki lad ban don bun tylli ki board ban pynkloi ia ka jingshim interview, ban buh ia ki interview protocols, pynbna ia ki jingdon jingem bad ki ram ki shah da u Chairman bad ki dkhot, ban thaw ia ka grievance cell, ban pyni paidbah ia ki marks ba ioh da ki kyrtong ba iakhun eksam, ban pyllait ia ki answer key hadien ka eksam bad kiwei kiwei.

Haba ia dei bad ki lynti kiba katto katne snem bad ba neh slem, u Myntri Rangbah ula ong ba ka Committee ka la ai jingmut ban leh da ki test lyngba ki computer ban pynkhlain ia ka MSC cell ha Jowai bad Tura, ban pynlong ia ka Combined Competitive Exam bad ban pynsangeh noh ia ka Optional paper. “Haba ia dei bad ki Optional paper, ngi lah dep leh teng ha ka eksam ba dang shu dep jong ka Meghalaya Civil Service (MCS) bad ngin sa leh kumjuh na ka bynta kiwei ki eksam ha ki sngi ban wan” ula pynbna.