U PA Sangma u nongialam sain hima ba iohi jngai ha ka politik

Ka University of Science and Technology Meghalaya (USTM) ka la pynlong ia ka Memorial Lecture ba khyndai halor ka phang: “The Legacy of P.A. Sangma, the Role of the Present Government and Meghalaya 2040”, kum ka dak ban kynmaw burom ia u (L) Purno Agitok Sangma, u nongialam ba iohi jngai ha ka kam politik hapoh ka ri bad u nongseng ia ka sur jong ka thain shateilam mihngi. U MLA ka Umsning Constituency u Dr. Celestine Lyngdoh kum u Kongsan, ula pynpaw ia ka jingkhraw jong u P.A. Sangma bad ula ong, “Ngi dang rakhe ia ka jingim jong u briew uba la ioh ban khur ia kiba bun ki jingjop tang ha ka por kaba khyndiat eh. Ym don uwei ruh ne kynthup ia nga, ban tip ba un long uba khraw, hynrei ula kylla long khraw namar ba ula aiti 100%”.

Ka Inspector General of Police barim ka Violet Baruah,  ka la pynpaw ba ka long kaba kongsan ban pdiang ia ka mynsiem jong u nongialam ba khraw u P.A. Sangma, uba don ia ka mynsiem sngewsynei na ka bynta ki para briew bad ka jingiadei kaba kane kaba thymmai, ia kaba ka jingkiew ka Artificial Intelligence ruh kan ym lah ban mih bujli satia. “U P.A. Sangma ula pyni ia ka bor jong ka jingdon ia ka jingiadei para briew naduh dohnud bad ngi dei ban pyniaid shakhmat ia kane” kala ong. U Vice Chancellor ka USTM u Prof. G.D. Sharma ula pynkynmaw halor ka jingiaid lynti ka jong u ban wan sha Meghalaya ha u snem 2008, hashwa ban sdang ia ka USTM ryngkat lang bad u Mahbubul Hoque bad u R.K Sharma bad ula iathuh ba ha ka por ba kila iakynduh ia u P.A. Sangma, u dang kynmaw sah ia ki kyntien ai mynsiem jong une u nongialam uba la ong “Ka skulbah ka jong phi kadei ban don ia ka kyrdan kaba bha tam ym tang ia ka thain shatei lammihngi, ha ka ri hynrei wat ha ka kyrdan jong ka pyrthei”.

U Prof Sharma ula ong ba kitei ki kyntien mynta ki la ioh ia ka jingim hapoh jong ka USTM lyngba ka jingjop ka jong ki kaba man la ka por, kynthup ia ka jingioh ia ka kyrdan ha ka Top 200 University bad ban ioh pdiang ia ka NAAC ‘A’ Accreditation na ka bynta 3 sien kynthih. Hadien kane la sam ia ki khusnam da ka song tyngka sha ki nongjop ha ka jingiakob thoh Essay bad jingiakob dro dur halor ka jingtbit ka jongki ban ai burom ia u P.A. Sangma bad la ioh ruh ia ki Ar tylli ki jingrwai kiba kit jingmut kiba kynthup ia kawei ka jingrwai Khasi bad kawei ka jingrwai Garo, ka la pynsngewtynnad ia ki jingpynpaw ia ka jingiakhun jong ka jylla, ka jingieid ri bad ia ka jingkmen kaba la pyni da u (L) P.A. Sangma lyngba ka kolshor tynrai.