Sah nud ka Kong Ampareen bym pat lah pynurlong ia ka Tura Medical Kolej

Ka Myntri barim ba khmih ia ka tnad ka koit ka khiah ka kong Ampareen Lyngdoh ka la pynpaw ia ka jingsahnud halor ka jingbym pat lah ban punurlong ia ka Tura Medical College. Ka kong Ampareen kaba dei ka MLA jong ka East Shillong konstiwensi, ka la pynpaw ka jingkmen namar ha ka jinglong Myntri jong ka, ka la lah ban pynurlong ia ka Shillong Medical College hynrei kaba sngewsih bad kaba sahnud ka long ba kam shym la lah ban pynurlong ia ka Tura Medical College, namar ka jingshah pynhap noh na ka shuki Myntri.

“Ka jinglah ban pynurlong ia ka Shillong Medical College, kan dei ka jingjop kaba khraw hynrei nga sngew sahnud pat bym pat lah ban pynurlong leh ia ka Tura Medical College,” la ong ka kong Ampareen haba kren sha ki lad pathai khubor. Ka la ong ba watla ka la shah pynhap noh kum ka Myntri, hynrei ka kyrmen ba kiwei kiba shimti ia kane ka tnad, kin bteng ia ki kam ba ka la leh bad kiba dang sahteng.

Ka kong Ampareen ka la pynpaw ruh ia ka jingsngew tynnad ba ha ka jinglong myntri jong ka, ka la lah ban pynkhlain ia ki PHC, CHC ha ka jylla, ka la lah ban pynbeit ia ki kam ki Asha nalor kiwei de.Ha kajuh ka por, ka Kong Ampareen ka dang pynsah ia ka jingsah ha ka umdum halor ka jingshah weng shuki bad ka kyrmen ba kan ioh ia ka jingshai na ki nongialam hynrei kum ka dkhot ka NPP ka long kaba kloi ban shim lada ki nongialam ki byn shet ha ka. Ka la ong ba lada dei ba la bthah ia ka ha ka rukom kaba dei, kam don jingwit eiei bad kam donkam ban iakren iapynbeit ia kano kano ka kam.