T.25 klur mang ka sorkar ban pynbha ia ka Kiang Nongbah Kolej

Ka Kiang Nangbah Government College ha ka sngi Saitjain ka la rakhe ia ka Foundation Day ne ka jingdap 59 snem bad u Symbud Myntri Rangbah ka jylla u Bah Sniawbhalang Dhar ula long kum u Kongsan. Ha kane ka jingrakhe u Bah Sniawbhalang u la plie ia ki jingtei ban pynitynnad ia ka kolej bad ia ka jaka pynieng ia ki thuk thuk bad la pynkup burom ruh ia ki samla pule ba la ioh bat ia ki kyrdan ba shakhmat ha ka skulbah NEHU bad la pynkup burom ruh ia ki nongtrei ba la trei palat ia ka 25 snem bad ia ki samla pule ba rim kiba la ioh ia ka kyrdan PhD.

U Principal ka Kiang Nangbah Government College u Dr. L.M. Darnei ula pyntip ba ka college ia mynta hi ka don 3,126 ngut ki samla pule ha ki 15 tylli ki shnad pule jong ka college. Ula iathuh ba kane ka jaka pule ka la nangkiew katba nangmih ki snem bad ula iaroh ia ka jingtrei shitom met bad mynsiem jong ki nonghikai bad ki nongtrei jong ka college.U Bah Sniawbhalang Dhar ula iaroh ia ka jingnoh synniang jong ki Principal kiba rim bad ki nonghikai bad ula ong ba ki la leh ia ka bynta ba khraw ban kyntiew shajrong ia kyrdan pule puthi ha ka thain.

U la ong ban ai 50 tylli ki Laptop sha ki nonghikai hapoh u bnai Risaw 2025 bad ula kyntu ia ki samla pule ba kin aiti ia lade ha ka jingpule khnang ba kin lah ban kiew shaphrang ha ka jingim ka jongki. U Symbud Myntri Rangbah ula pyntip ruh ba la pynkhreh ia ka Detailed Project Report (DPR) kaba T.25 klur na ka bynta ban pynbha bad pynitynnad ia ka Kolej.