Pynlong Health Camp ka NEIGRIHMS ban pynshai ki lad sumar ka koit ka khiah hapoh ka Swasth Nari Sashakt Parivar Abhiyaan

Ka North Eastern Indira Gandhi Regional Institute of Health and Medical Sciences (NEIGRIHMS), Shillong mynta ka sngi ka la pynlong ia ki prokram ban ai jingtip bad ai jingshakri ba ia dei bad ka koit ka khiah hapoh ka Swasth Nari Sashakt Parivar Abhiyaan (SNSPA), kum sienjam jong ka ri baroh kawei ba thmu ban pynkup bor ia ki longkmie bad ki longiing longsem lyngba ka koit ka khiah bad ka jingbam ba tei met. Ha kane ka sngi la sakhi ïa ka jingïashim bynta shitrhem ki doktor, ki nongtrei ka koit ka khiah, ki samla pule bad ki nongshong shnong ban pynlong ia ka prokram kaba jop ban pynshai ia ka jingdonkam ha ka koit ka khiah ha ka jylla. Ia ka prokram la pynlong naduh ka 17 tarik u Nailur bad kan bteng haduh ka 2 tarik u Risaw, 2025, kynthup ïa ki tnad ka NEIGRIHMS Hospital ban peit bniah ia ki nongpang bad ki jingpynshai ia ki paidbah halor ka koit ka khiah ha kane ka camp. Kum shibynta jong ka campaign, la pynlong saw tylli ki prokram ai jingtip bad jingshakri ba kongsan ha kajuh ka por mynta ka sngi. La pynlong ia ka jingialang pynsngewthuh shaphang ka jingkoit jingkhiah ha ka bor pyrkhat pyrdain ha Old Age Home, Shillong, ha kaba la kren ia ki jingeh ha kaba iadei bad ka jingsumar ia ki tymmen, ka jingsumar ialade, bad ka jingkoit jingkhiah ha ka bor pyrkhat. La pynlong ia ka camp ai snam ryngkat bad ka jingiashim bynta shitrhem ki nongtrei, ki samla pule, bad ki nongai snamna ka thain.

Ha ki skul, la pynleit jingmut bha ha ki khynnah kynthei, ha kaba la pynlong ïa ka prokram halor ka jingkhuid jingsuba haba wan bnai bad ka jingbam ba tei met kaba la pynlong ha Mawpat Presbyterian School, Shillong, ha kaba la ïalam da ka tnad Obstetrics &Gynecology bad ka Dietary Unit. Ha ka OPD jong ka NEIGRIHMS, ki nongpang kiba wan ban ïoh jingmut ki la ioh ia ka jingpeit bniah ha ka koit ka khiah, kaba kynthup ïa ka jingpeit bniah ïa ka jingpang tuberculosis bad ki jingpang bym ia bit kum ka jingpang hypertension bad ka jingpang shini, ki jingshakri ba ia dei bad ka physiotherapy, ki jingpeit bniah ïa ka jingbam kaba tei, ka jingsam ïa ki dawai IFA bad ki dawai calcium, bad ka jingiasyllok halor ka jingleh khuid bad ka jingkoit jingkhiah bad kiwei kiwei de. Haba ai jingkren u Prof. Star Pala, Tnad Community Medicine NEIGRIHMS ula ong, “Ki la don saw tylli ki prokram ai jingtip ba la pynlong mynta ka sngi halor ka jingkoit jingkhiah ha ka bor pyrkhat ha Old Age Home, ka blood donation camp, ka prokram ai jingtip ha Presbyterian School Mawpat, bad ki jingpeit bniah ïa ki nongpang ha OPD. Ka dei ka sienjam kaba bha, khamtam na ka bynta ka koit ka khiah bad ka jingbam tei met bad kaba la buh thong na ka bynta ka koit ka khiah jong ki kynthei. Ngi thmu ban bteng ïa kine ki kam hadien ka 2 tarik u Risaw ruh.”

Haba bynrap shuh shuh, u Prof. (Dr.) Suvamoy Chakraborty, Medical Superintendent, NEIGRIHMS, u la kren shaphang ki jingshakri bad ki jingdonkam bapher ba la pynbiang hapoh ka campaign. U la ong, “Mynta ha ka hospital jong ngi, phi la ïohi ba ki don san tylli ki kiosk, ryngkat bad baroh ki jaka sumar ba kyrpang. Ki don katto katne ki nongpang kiba la synran lang da ki kynthei, kiba lah ban nym dei ki nongpang hynrei ki nongap ia ki nongpang. Ngi la peit ia ki jingdonkam jong ki ruh. Ngi dang peit bniah man ka por ia ka koit ka khiah kum ka blood sugar, ka jingkhein ia ka hemoglobin, ka jingai jingmut shaphang ka jingbam ba tei met, bad khamtam eh kaba iadei bad ki longkmie bad ki khynnah kynthei, ngi la ai jingbatai halor ka jinglehkhuid. Na ka bynta ki longkmie, ka dei ka jingpeit bniah ia ka jinglehkhuid ha ka por ba dang pun khun, bad na ka bynta ki khynnah skul, ka dei ka jingleh khuid ha ka por ba poi bnai bad kumno ban sumar ia ka koit ka khiah jong ki. Ngi dang pynleit jingmut kyrpang ruh ha ka jingbam kaba tei na ka bynta ki longkmie.”

U Dr.Chakraborty u la ong ba kane ka prokram kam dei tang ha ka jaka sumar hynrei shen yn sa pyniar sha kiwei pat ki jaka treikam bad kiwei ki shnong. “Yn sa pynlong ia ki camp ha ka jaka ai jingsumar ia ki briew ba la ngop ha ka jingdih drok, ka juvenile home ha Mawkasiang bad ruh ha phatok. Ha ka por jong ka Durga Puja ha kaba ki hospital kin khang, ngin buh ruh ïa ki kiosk ha ki pandal bapher bapher na ka bynta ki longkmie ki ban wan sha ka puja,” u la ong. U la bynrap ha ki taiew ban wan la thmu ban pynlong ïa ki prokram ai jingtip bad bad ki health camp na ka bynta ki kynhun shipai ïada ri kum ki BSF, 101 Area Army, Air Force, bad Assam Rifles ha Meghalaya ban iarap ha ka koit ka khiah. Da kaba pynïasoh lang ïa ki jingpeit bniah, jingiasyllok, ka pynhai shaphang ka jingbam ba tei met, ka jingkyntiew ïa ka jingkhuidj ingsuba bad ban pynhai kyrpang ia ki longkmie, ki samla bad ki tymmen, ka campaign ka pynkhlain ïa ka jingpynleit jingmut ka institute halor ka koit ka khiah ba pura.