Kyrmen u Symbud Myntri ban lah shim rai noh halor ka them metor

U Symbud Myntri Rangbah ba khmih ia ka Tnad Urban Affairs u Bah Sniawbhalang Dhar ula ong ba ka Sorkar Jylla ka kyrmen ban lah shim rai noh ia ka jingtyrwa pynkynriah ia ka Them Metor na Them Iew Mawlong hashuwa ban kut une u bnai.

Haba kren shaki lad pathai khubor u Bah Sniawbhalang u iathuh ba ka dang sah sa kawei ka jingialang hashuwa ba ka Sorkar kan shong bishar ia ki jingtip baka ioh khatduh.

“Ngi don jingthmu hashuwa ban kut une u bnai. Ngin dang ban iashong sa kawei ka jingialang bad ngin sa shim ia ka kaiphod kaba dei thik ia kane ka kam. Lehse ngin sa ioh ia ka kaiphod ba khatduh” ula ong.

Kat kum ka jingong jong u, kawei na ki lad ba iakren ha ka jingialang ba khatduh ka long ban kyrpad ia ka jaka na ki bor shipai ban pynkynriah ia ka Them Metor.

Ka Sorkar mynta ka dang ap ia ka jingaiktien na ki heh shipai hadien ka jingialang bala pynlong ha ki kyrdan bapher bapher.

“Ngi dang ap ia ka jingiakren ba khatduh hapdeng ka Sorkar bad ki bor shipai. Kumta, toh ngin kyrmen ba hashuwa ban kut une u bnai ngan sa lah ban iasam jingtip haba iadei bad kaei kaba long ba man mynta jong ka kam Them Metor” ula ong.

Halor ka jingeh ka jaka ba pan, u Bah Sniawbhalang ula ong ba kam pat don ka jingiakren ia ka jingheh ka jaka katba ka jingiakren kan dang ban long ia kiei kiei baroh.

“Ngin shym la pan katno. Ngi hap ban iakren shuwa. Lada ki long ba kloi, ngin sa ong katne ka jaka ngi kwah. Ngi la dep ithuh 2-3 tylli ki jaka hynrei haduh mynta ngim pat ioh ktien eiei na ki shipai, namar wat u Myntri Rangbah ula iashong jingialang kumba 2-3 sien bad u Myntri kam iada Ri” ula ong.

Haba kylli ia ka Blueprint bala pynkhreh da ka Sorkar ban pynkynriah, u Bah Sniawbhalang ula ong ba kane kan dang iai don ha ka miet, hynrei ka Sorkar kala buh ruh ia ka jaka shipai kum kawei pat ka lad.