Yn sa shong jingïalang ka KHADC bad KSU halor ka jingkam ba don ki MLA barim ba thied jaka ha Domiasiat

U executive member ka KHADC u ba khmih iaka tnat Land u Bah Powel Sohkhlet ula ong baka Executive Committee (EC) kan sa shong jingialang bad ka Khasi Student Union (KSU) ban ioh jingsha haba iadei bad ka jingkam, ba don ki MLA barim kiba mut thied jaka ha Domiasiat.

Haba kren shaki lad pathai khubor u Bah Powel ula ong ba ka District Council kan sa wad jingtip halor ka jingkren ka KSU ba don ki riew shimet khatam ki MLA barim kiba thmu ban thied jaka ha Domiasiat naka bynta ban pynim biang iaka mat tih Uranium.

“Lehse ngin sa pan jingtip ba kham bniah naka KSU, ka iaid kumno kane ka jingthmu, hato ka long kaba shisha ne em kata ka jingdon ba thied jaka, ngin iakynduh iaka KSU bad ngin sa pan jingshai shuh shuh naki” la ong u Bah Powel.

U Bah Powel ula ong baka Voice of the People’s Party (VPP) kadei kawei naki Party ba pyrshah bha ban tih uranium.

“Ngin sa rah hakhmat u Chief executive member (CEM) bad haka Executive Committee (EC) la ngi donkam ne em ban thung daka Inquiry Committee ban tip kham bniah halor ka jingkynnoh ba don kiba thmu ban pynim biang iaka mat tih Uranium na Domiasiat South West Khasi Hills” ula ong.

Haba iadei bad ka jingdawa ban mynjur daka Resolution, u Executive Member ka KHADC ula ong “Hoid kala don ka jingdawa daka Resolution bad halor kane ka EC kala ioh pdiang shithi ba ki nongialam ba thymmai jong ka KSU ki kwah ban iakynduh ia ngi, lehse ngin sa buh iaki jingialang ha kine ki sngi ban wan ban pyntip shaka KSU halor kane ka mat”.

U EM ula pyntip ruh ba haduh mynta ka UCIL kam pat phah kano kano ka jingthoh shaka KHADC halor ka mat tih Uranium. “Lada ka phah ruh ngin kyntait beit namar baroh shi katta ngi la pyrshah, ngim pdiang wat tang iaka shithi ruh, ngin iakren leh aiu haba ngi la pyrshah lypa” ula ong.