Kynduh u Conrad bad nongialam balang ia u Amit Shah

U Myntri Rangbah ka Jylla u Conrad K. Sangma ryngkat bad ki nongialam niam ka Jylla hynne ka sngi, ula leit iakynduh ia u Myntri Kam Pohiing ka ri u Amit Shah, ha New Delhi ban pynpaw ia ka jingsngewkhia halor ki kyndon jongka Foreign Contribution (Regulation) Act ne FCRA.Ha katei ka jingialang, katei ka kynhun kala pynsngew ha u Myntri Kam Pohiing ia ka jingsngewkhia ka jylla ha kaba iadei abd ki katto katne ki kyndon jongka. Foreign Contribution (Regulation) Act (FCRA), kynthup ia ka jingthmu ban pynkylla thymmai ia kane ka aiñ bad ka jingktah ia ka rukom treikam jong ki niam, ki jaka pule, ki shnad kiba donbynta ha ki kam noh synniang ha Meghalaya.

Kine ki jaka treikam ki pyniaid ia bun tylli ki skul, college, hospital bad ki prorkam ai jingshakri kiba ai jingmyntoi ia ki paitbah ha kylleng jong ka jylla khamtam eh ha ki jaka kiba don ha nongkyndong bad ha ki jaka kiba don sha kyndong bha.U Myntri Rangbah ula pynshai ia ka jingkongsan ki kamram kiba la leh da kine ha ka bha ka miat bad ha ka jingim ha ka pule puthi jong ka jylla bad ula kyntu ia ka Sorkar Pdeng ban shim ia ka jinglong kyrpang jong ka jylla Meghalaya ha kaba iadei bad ka jingpyntreikam ia ka FCRA.U Conrad ula pan ruh ia ka jingshimkhia ka Sorkar Pdeng ha kaban pynthikna ba ki jaka treikam kiba shisha kiba donbynta bad ka jingai jingshakri ia ki paitbah kin ioh ban bteng ia ka kam ka jongki khlem kano kano ka jingpynthud.

Kane ka kynhun kaba leit iakynduh ia u Myntri Kam Pohiing hapoh ka jingialam u Conrad Sangma ka kynthup ia ki nongmihkhmat na ka Presbyterian Church of India (PCI), North East India Christian Council (NEICC), Catholic Church (Archdiocese of Shillong) bad ka Garo Baptist Convention, kiba kynthup ia u Rev. H. L. Myrsing, Moderator, PCI, u Rev. S.C. Diengngan, Chairman, FCRA Sub-Committee, PCI, Rev. Dr. Meyu Changkiri, General Secretary, NEICC, Fr. Teiboklang Kharbani, Administrator ka Archdiocese of Shillong bad u Durasal R. Marak, Youth Director jongka Garo Baptist Convention bad kiwei kiwei.