Plie u MLA ïa ka Viewpoint ba lah ban iohi ia ka sor Jowai

U myntri sorkar uba dei ruh u MLA ka Jowai Constituency u Wailadmiki Shylla mynta ka sngi ula plie paidbah iaka Viewpoint ba lah ban iohi iaka sor Jowai lem ki sharing lum ba itynnad jongka, ha ryngkat ka jingdonlang u Deputy Commissioner ka West Jaiñtia Hills District u Abhinav Kumar Singh, u BDO ka Thadlaskeiñ C&RD Block Dr.H.Niang, u waheh shnong Khliehtyrshi u Kitbok Rymbai lem ki paidbah nongshnong shnong bad kiwei.

Kane ka Viewpoint ka don ha Pdeiñ Chahtngit jongka shnong Khliehtyrshi, kaba hap hapoh ka Thadlaskeiñ C&RD Block West Jaiñtia Hills District, harud u surok thymmai Jowai Bypass ba pyniasoh bad u surok Jowai Dawki na Treiongriang bad u surok Jowai Shillong ha Khliehtyrshi.

Ia kane ka Viewpoint la shna lyngba ka CM Catalytic Fund hapoh ka jingpeit jingkhmih ka ophis u Deputy Commissioner West Jaiñtia Hills, bad iaka jaka ba shna la long trai daka kong Jaijai Rymbai.

U kongsan Wailadmiki Shylla haba ai jingkren u ong, ka jaka jngohkai dei kawei naka lad ba iarap ban kyntiew iaka ioh ka kot ha kine ki sngi.

Bad haki sngi bala dep shadien watla ia une u surok ym pat plie ruh la bun bha ki paidbah ba wan shangkai pyngngad namar ka jingitynnad ki sawdong sawkun, kumta u kyrmen ba nangne shakhmat kano kano ka jingthmu kiba don jaka lyngba une u surok Bypass kan long kaba pynmyntoi iaki.

U ong ruh ba ka jingplie mynta ka sngi kam dei ban kut tang ka viewpoint hynrei naka bynta ka jingmyntoi lang yn sa shna ruh ki paiñkhana, ki dukan bam bad dukan pyni nam ne die iaki tiar tynrai ba shna ba thaiñ da ki briew kane hi ka thaiñ.

Shuh shuh u ong kumba kane kala dei lypa ka jaka ba itynnad lada dei ba ioh daka jaka ba kham heh kumba la ai jingmut u waheh shnong, naka liang jong u un wad ki lad ki lynti kumno ban wanrah ki jingdonkam, kumba ka tnat tourist ruh ka long kloi bha ban iarap haba iadei bad ki kam jngohkai lada dei ban shna ki jaka sah, jaka peitkai bad kiwei kiba dei naka bynta ban kyntiew iaka ioh ka koit jong ka shnong ka thaiñ kumjuh ban iohkam iohjam ki khun samla.

Kumba mynta ka sngi dei ka jingaiti ia kane ka view Point shaka shnong Khliehtyrshi kumjuh ka trai jaka u kyrmen ban don ka jingiatreilang ryngkat hapdeng ki bor district ka dorbar shnong bad trai jaka.

Kiwei pat ba ai jingkren kynthup u Deputy Commissioner Abhinav Kumar Singh, u waheh shnong Khliehtyrshi bad kiwei.