Iakynduh u Bah Sanbor ia u Himanta, ha ka jingleit sngewlem ba khlad u Zubeen Garg

U Myntri Sorkar ka Jylla bad u nongialam ka seng BJP u Bah Sanbor Shullai hynne ka nsgi ula iakynduh ia u Myntri Rangbah ka Jylla Assam u Himanta Biswa Sarma bad pynpaw ia ka jingsngewlem halor ka jingkhlad noh jong u Zubeen Garg u nongrwai ba pawnam ka jylla Assam. U Bah Sanbor ula pynpaw ka Jylla Meghalaya ka ia snohkti lang bad ka Assam bad ka thain baroh kawei ban leh burom ia ka jingkhlad noh utei u nongrwai ba pawnam ka Jylla Assam.

“U Zubeen Garg u dei u briew uba don ka sap ka phong ba tbit bad uba la aiti ia la ka jingim ha ka rwai bad ka tem ka put bad ula iehnoh shadien ia ka matti jong ka jingriewspah ka ri ha kolshor tynrai” la ong u Bah Sanbor bad ka bynrap “Lyngba ki jingrwai jong u, la tei ia ki jingkieng ba la pyniasoh bad ki jylla bapher bapher bad wanrah ia ka mynsiem jong ka thain shatei lammihngi ha ki rynsan jong ka ri bad ha ka pyrthei”. U Myntri ula ong, na ka liang ka sorkar Meghalaya bad ki paidbah ki phah ka jingsngew lem sha kiba haiing ba hasem, kiba ieit ba thoin bad ki paralok ki parajor bad kiba ieit ia ka jingrwai ki jong u bad ula ong ba ki jingrwai ki jong u ki la ai mynsiem ia kiba bun ki nongrwai bad ki nongtem na ka jylla Meghalaya, kiba sngewsih ia ka jingkhlad jong u Zubeen Garg.

U Bah Sanbor ula pynpaw ba u Blei Trai Kynrad un ai bor ka jingpyntngen ia ki ba haiing ba hasem bad un ai ka jingjah thait junom ia ka mysniem ba la duh noh bad ba ki kam ba khraw kiba la leh da u Zubeen kin iai bteng ban ai mynsiem ia ki nongrwai bad ia ki riewieid jingrwai ha ki pateng ban dang wan.