Sahteng ka jingpyntreikam ba donkam pynkylla ha ka riti synshar: Prestone

U Symbud Myntri Rangbah ka jylla u Bah Prestone Tynsong u la ong, kumba 50 haduh 60 percent ka jingiateh kular la pyndep, hynrei ka jingpyntrei kam ia ka jingiateh ka sahkut, namar donkam ban wanrah ka jingpynkylla lyngba ka 125th Amendment ka Riti Synshar ka Ri bad mynta ka don ha lynti ban ioh jingmynjur ha ka Iingdorbar thawain ka Ri ne Parliament.Ia kane ula kren ha ki nongthoh khubor hadien ka jingialang bad ki nongialam ki kynhun kieng atiar na rilum Garo kiba la khylliap lama kynthup ia ka Achik National Volunteers Council (ANVC) bad ka ANVC-B, ha kaba ki la rai ban thung ia u Nodal Officer ban khmih bniah kyrpang halor ka jingpyntreikam ia ka jingiateh kular ne ka Agreed Text for Settlement ba la iasoi hapdeng ki kynhun kieng atiar bad ka Sorkar Pdeng bad ka Sorkar Jylla ha u snem 2014.U Bah Prestone ula ong, ka shong ha ka Sorkar India bad ka Parliament namar ki la rah ia katei ka mat hapoh ka Rajya Sabha bad ha ka iingdorbar Lok Sabha bad ka la phah sha ka Parliamentary Standing Committee (PSC) bad dang shen ka PSC ka la bthah sha ka MHA bad ka la sahkut sah hangne.

“Ngin bud dien ia kane ka Amendment dei ban mynjur da ka parliament. Ki don ki dieng pyngkiang katba ym pat mynjur ia ka Amendment namar ka don jingiadei bad ka riti synshar ka ri India. Namar ki don katto katne ki bynta ki mat kiba donkam ban pynkynriah noh (transfer) sha ki ADC, ia kane yn hap ban wanrah ia ka jingpynkylla hapoh ka parliament” la ong u Bah Prestone Tynsong.Ula ong ka sorkar ka la shim ka rai ban thung ia u Ophisar ba pura ne u Nodal Officer ban iatreilang hapdeng ka sorkar, ANVC & ANVC.B bad ka Garo Hills Autonomous District Council (GHADC) ban pyniaid shakhmat ia ka jingpyntreikam ka jingiateh kular ba dei ban pyntreikam thikna bad ban iakynduh man la por bad ki dkhot ka ANVC & ANVC.B.Ula iathuh ha ka jingialang ki la iatai sani ia ki mat ba ia dei bad ki projek kam pynroi kynthup ka jingshna surok, pynneh ia ki khlaw ki btap, ki sienjam ba ia dei bad ka kolshor kum ki Auditoriums, Library bad ki Cultural Center.U Bah Prestone Tynsong ula pyntip ba ka pisa ban pyntreikam ia ka Garo Accord kan wan khyndiat na ka Sorkar Pdeng bad khyndiat na ka Sorkar Jylla bad ula ong ba ka sorkar ka la dep ban siew pynkhuid ia ka Surrender Package ne jingiarap pisa ia ki 500 ngut dkhot ba la pyndem wait ka ANVC bad ANVC-B ia ki dkhot baroh T.1.50 lak bad ia ka Stipend man bnai ba T.3,500 na ka bynta 6 bnai.

U Bah Prestine ula pynshai kam don kano kano ka jingthmu ban pynkhie im biang ia ki kynhun kieng atiar hapoh ka rilum Garo.U la bynrap ka sorkar kan pynlong man la ka por ia ka jingialang ban khmih bniah ia ka jingiaid shakhmat ki kam ba dang sahteng.”Ngi lah iakren bad iatai halor ki District Council. Ka Text Agreed Settlement ka ong, ba ka sorkar ka dei ban pynkhlain shuh shuh ia ki ADC bad ki ADC ki dei ban don ka jingkitkhlieh ban pynneh ia ki trai muluk bad wat ia ka jingtreikam ki ADC ruh dei ban pynkhlain. Namar kata, ka don ka jingiasoh bad ka jingpynkylla ia ka Sixth Schedule” la pynkut u Symbud Myntri Rangbah ka jylla.Ia kane ka jingialang la lum da u Symbud Myntri Rangbah ka jylla u Bah Prestone Tynsong uba peit ia ka kam Pohiing bad ka tnad District Council Affairs bad ka la donlang u Chief Secretary ka jylla u Bah DP Wahlang, ka DGP Kong I Nongrang bad ophsiar sorkar na ki tnad bapher.