Khot ïakren u Myntri ia ka KSU ba dawa weng na ka thup pule Doctor ka bhah Sorkar

Ka Khasi Student Union (KSU) ka la pyntip ba kan leit pan jingpynshai na u Myntri ka tnat ka koit ka khiah u Bah Wailadmiki Shylla halor ka jingshah kyntait ki katto katne ki samla riewlum trai Jylla ban ioh pule Doctor na ka bhah Sorkar (State Quota). Ïa kane la pyntip da u General Secretary ka KSU u samla Donald V Thabah bad ula ong, ba ka Seng kam pdiang satia ia ka thup ba pyllait ka tnat ka koit ka khiah ia ki kyrteng jong ki samla pule kiba ioh pule Doctor na ka bhah Sorkar.

Haba kren sha ki lad pathai khubor u samla Donald ula ong ba ka seng kam lah ban pdiang ia ka thup namar ki dang don bun ki samla riewlum trai Jylla kiba ioh heh Marks lada nujor bad ki bym dei riewlum kiba shah kynthup ha ka thup pule Doctor na ka bhah Sorkar. U Samla Donald ula kynnoh baka Sorkar Jylla kala iaid lait iaka Reservation Policy daka kyntait iaki riewlum trai Jylla kiba ioh heh Marks ban pule Doctor naka bhah Sorkar. “Ngim tip kaei ka daw ba ki samla reiwlum trai Jylla ki shah kyntait, satang ka Sorkar kan lah ban pynshai, la ka leh khnang, ne don ka jingleh thurmur namar kata u Myntri ka tnat ka koit ka khiah ula khor iaka seng ban wan ïakren halor kane haka 6 tarik Risaw” la ong u samla Donald.

U Samla Donald ula ong ba kane ka jingleh ka Sorkar ka ktah bha iaka lawei ki samla pule trai Jylla bad ka Sorkar kadei ban pynbeit mardor ïa kane ka thup.“Ngin sa peit la 6 tarik kaei kaba mih naka jingïakren bad u Myntri ka tnat ka koit ka khiah hynrei ka KSU ka ïeng skhem haka nongrim ban pynbeit mardor iaka thup pule Doctor naka bhah Sorkr” ula ong.