Khang ki bor District ia ka lynti kjat sha kshaid Krangshuri Hiar jurip u MDC VPP

Hadien ka jingud jingnam ki paidbah ba shong basah shajan ka kshaid Krangshuri kawei na ka jaka jngohkai ba pawnam ba don harum ka shnong Amlarem West Jaiñtia Hills District, ba ki mad jingeh shi kat dei na ka jingkhang ia ka lynti iaid kjat sha katei ka kshaid da ki bor pyniaid district ka West Jaiñtia Hills District mynta la palat 4 bnai na ka daw ba twa ka kynroh ba la tei mar syndah bad kane ka lynti iaid kjat, kumta mynta ka sngi u MDC ka War Central u Jamshaphrang Pohtam ula leit jngoh ia kane ka lynti kaba tip kum ka Shmea Leskor kaba la shna naduh ka por u syiem Jaiñtiapur. Ha kane ka jingleit jurip u MDC Jamshaphrang Pohtam u ong ba ki paidbah kila pynpaw ka jingsngewkhia halor ka jingkhang slem ia kane ka lynti bad khlem leh ei ei ia kane ka kynroh bala twa.

Namar naduh ba twa kane ka kynroh ki paidbah kila mad jingeh ban leit tong um, leit saitjain, leit sum sha ka wah bad ha kajuh ka por kala pynduh nong bha iaki namar ba ki nongjngoh kai kim iohlad shuh ban iaid na kane ka lynti bad bun ki nongshong dukan ruh kila duhnong bym don shuh ki nongthied nongpet. U ong ki sheptiieng ruh ba ioh kane ka lynti iaidkjat kaba la ithuh kum kawei naki matti sahnam ki longshwa manshwa kan duh kan dam lada ym sumar noh iaka mar mar. Nalor ba ka jingpynsahteng ban sumar pynkhuid iaka haduh mynta ka pynartatien iaki ioh don ka jingthmu ba sha lyndet.

Hadien ka jingjurip u MDC u iathuh ba ula leit iakynduh bad ka SDO ka Amlarem Civil Sub-Division bad kala khot jingialang haka por 3 baje bala donlang naduh ki bor district ka West Jaiñtia, u BDO Amlarem C&RD Block, ka tnat tourism, ki bor pulit, ki trai kynroh, ha kaba kila iakren iamir jingmut ban leh ei ei tang shu rang u slap nalor ban pynkhuid noh.  Na ka liang u MDC Jamshaphrang Pohtam ula kyntu iaki trai kynroh ba lada ki don ka jingiatiplem para briew ban ia im ia kiew lang haki liang baroh dei sumar bad pynneh pynsah ia kane ka lynti.  Kumjuh ruh u kyntu iaka SDO ba kum ki shakri paidbah kin leh kaba bha tam khlem da pyndem ha kino kino ki bor pynthame lada dei ki bor saiñ hima sima.