Pynkup burom ïa u Lat ka jylla Meghalaya da ka khusnam Kaveri Prashasti

Ha ka jingïalang pynkupburom ba donburom hynne ka sngi ha ha Raj Bhavan, u Lat ka jylla u Shri C.H. Vijayashankar la pynkupburom da ka khusnam Kaveri Prashasti da u Dr. Sri Sri Trinetra Mahanta Shivayogi Swamiji u pontiff ba don burom jong u Sri Durdandeshwara Mahanta Shivayogi Math, ka Mandya district bad u Sri D. M. S. Chandravana Ashrama, uba don ha ki rud duriaw sepngi jong ka wah Kaveri kaba kyntang ha Srirangapatna, Karnataka. Ha ka jingïalang pynkupburom la don ryngkat lang ki riew khmat nongsynshar ka jylla Meghalaa khamtam u Myntri Rangbah u Conrad K. Sangma, u Symbud Myntri Rangbah ka Jylla u Bah Prestone Tynsong, u Myntri Cabinet ba pawkhmat u Marcuise N. Marak, bad u Chief Secretary ka jylla u Dr. P. Ahammed bad kiwei ki heh sorkar. Ïa kane ka khusnam Kaveri Prashasti la sam kum ka jingithuh ïa ki jingnoh synñiang ba kyrpang jong u Lat ka jylla u Vijayashankar ha ka jingshakri paidbah bad ka jinglong nongïalam ha kine ki phew snem.

Ha ka jingkren pdiang burom jong u Lat ka jylla, u la pynpaw ïa ka jingsngewnguh kaba khraw ïa u Swamiji na ka bynta kane ka jingpynkup burom. U la ïaroh ïa ka jingshakri paidbah ha ka synshar paidbah ba kynja mynsiem ïa ka jaitbynriew kyntup ha ki bynta ka pule puthi, ka koit ka khiah, ka jingsuk, bad ka shongsuk palei mynsiem ha ka imlang ka sahlang kyllum lang ki jaitbynriew bad jait jingngeit bapher ha ka jylla “Ka khusnam Kaveri Prashasti ka don ka jingmut kaba jylliew bha”, la ong u Lat. “Kumba ka Wah Kaveri ka pyndap ïa ka jingim bad ka pyni ïa ka jinglong khuid, kane ka khusnam ka long kum ka jingpynkynmaw ïa ngi ban ïaleh na ka bynta ka jingbha bad jingshakri paidbah kaba khuid ba suba bad ba palei kum ka wah ba kynja mynsiem.” U Lat u la pynpaw ba kane ka dei ka khusnam kaba nyngkong eh kaba u la pdiang ha ki 69 snem jong u, da kaba pynpaw ïa ka jingburom shimet bad ba kynja mynsiem jong ka pateng ba phyrei ban wan hadien habud. “Kane ka khusnam kam dei kaba la tih marwei, ka dei jong ka jylla Meghalaya, ki briw jong ka jylla bad kyllumlang ka jaidbynriew ha ka ri”, u la bynrap.

U Myntri Rangbah ka Jylla Conrad K. Sangma, ha ka jingkren jong u, u la ai khublei ïa u Lat halor katei ka burom kaba duna bha, da kaba khot ïa ka kum ka jingpynpaw ïa ka jingshakri paidbah kaba aiti lut da ki phew snem, ka jinglong rit mynsiem, bad ka jingaiti lut na ka bynta ka bha ka miat jong ki paidbah. U la ai burom ruh ia u Swamiji na ka bynta ka jingtrei shitom jong u ha ka liang ka pule puthi, ka koit ka khiah, ka mariang, bad ka jingpynkiew mynsiem. “Kane ka jingithuh kan ai mynsiem ia kiba bun, khamtam kito kiba don ha ka imlang sahlang, ba kin shakri da ka jingsngewrit bad ka jingsngewrit”, la ong u Myntri Rangbah ka Jylla. “Ka pynshlur ïa ki samla ban bud ïa ka lynti jong ka jingshakri da ka jinglong ba janai bad ka jingaiti lut na bynta ki paidbah bad ka suk ka saiñ kaba jop.”