Pynïap biej ki khynnah da ki jingshad ha ka sngi plie ka jingdap 50 snem ka skul Bynther

Ka Bynther Secondary School kaba don ha ka shnong Madan Bynther ha ka 10 tarik u risaw 2025, ka la plie pyrda ïa ka jingrakhe dap 50 snem ka jingïaid lynti ka Skul ban tbeh ïa ka jingnang jingstad sha ka dong ka thain naduh bala seng ïa ka ha u snem 1976. Ïa kane ka jubilee ksiar jong ka Bynther Secondary School la wan ban plie da u myntri ba dei khmih ïa ka tnat Community & Rural Development ka Sorkar jylla, u bah Sosthenes Sohtun ha ka jingïadon lang u MLA ka Mawthadraishan u bah Shakliar Warjri, ki dkhot ka managing committee, ki ba haing u nongseng ïa ka skul, ki ophisar sorkar, ki past pulpil, ki nongïalam shnong bad kiwei kiwei kiba la shahkhot sngewbha.

Nalor ka jingpynher ïa ka lama jubili, u bah Sosthenes Sohtun ula ïoh ruh ban plie ïa u motdur sahkynmaw ïa u bah Bhatiarsing Syiem bamkwai ha dwar u Blei, uba dei u nongseng ïa ka Bynther Secondary School bad ïa kong Kwilsila Marbaniang Bamkwai ha dwar u Blei, kaba dei ka nongai sngewbha ïa ka khyndew ban tei ïa ka Skul.Shuh shuh ha kane ka sngi la ïoh ruh ban pynsngew ïa ka history ka jingïaid lynti ka Bynther Secondary School da ka Headmistress ka kong A. Kharsyntiew bad la pynphuh pynphieng ïa ka jingrakhe plie Jubili Ksiar da ki jingrwai bad ki jingshad na ki khynnah pule jong ka skul.

U bah Sohtun u la ong ban seng ïa ka skul kam long kaba suk hynrei ka jingïohi jngai ka ïing ka sem u bah Bhatairsing Syiem bad ka kong Kwilsila Marbaniang ban seng ïa ka skul bad ban ai sngewbha ïa ka khyndew ban tei ïa ka skul mynta kala long ka jingkyrkhu ïa ka shnong ka thaw bad ïa ki khynnah pule. U bah Sohtun u la aikhublei ruh ïa ki nonghikai bad ia baroh kiba la don bynta ban pyntyllun ïa kane ka skul haduh ba kan da kynjoh ïa u mawmer jong ka jingdap 50 snem ka jingïaid lynti ban tbeh ïa ka jingnang jingstad sha ki khynnah pule ka dong ka thain. U la kyntu ruh ïa ki khynnah pule ba ha kane snem jubili ki dei ban kut jingmut ban pynsah kynmaw ïalade da kaba ïakhun tyngeh ban poi sha khmat haka examin matrik.