Dawa ki khun ki hajar ka Hima Langrin ban weng noh ia u Acting Syiem

Ki khun ki hajar ka Hima Langrin hynne ka sngi ki la ai dorkhas ha u Executive Member (EM) ka Khasi Hills Autonomous District Council (KHADC) u Bah Denzil Raynard Chen ban dawa weng noh ia u Paiem Nongtei Sing Syiemiong uba bat mynta kum u Acting Syiem ka Hima Hima Langrin. Naduh u snem 2023, ka Hima Langrin kam don u Syiem pura bad naduh mynta u snem u Paiem Nongtei Sing Syiemiong u bat kum u Acting Syiem ka Hima Langrin. Haba kren sha ki lad pathai khubor u Bah Faindness Syiemiong ula ong, ba ka jingdawa ki khun ki hajar ka Hima Langrin ban weng noh ia u Acting Syiem ka dei namar ba ki la duh ka jingshaniah ba un bteng kum u Syiem ne nongpyniaid ia ka Hima. “Ngi kwah ba ka Hima kan don noh da u Syiem ba pura khnang ban iaid beit iaid ryntih ki kam hapoh ka Hima bad khnang ba u Syiem ba pura un iada ia ka hok ka jong ngi ym dei tang ia mynta khamtam ia ka lawei ” la ong u Bah Faindness.

Kumta ula dawa na u EM ban weng noh ia u Acting Syiem, khnang ba ka Hima Langrin kan lah ban iada ia ka riti dustur ba la buh da u nongthaw naduh kulong kumah bad kumjuh ki kam pynroi. U Bah Faindness ula ong, ki khun ki hajar ka Hima kim don shuh ka jingshaniah bad kim kwah shuh ba u bah Nongtei Singh Syiemiong un bat ia ka khet kum u Syiem. Haba kylli, u Bah Faindness ula iathuh naduh u snem 2023-2025 kim don shuh ia u Syiem ba pura, namar ba ia u Nongtei la dep ban sospon ha u snem 2023 bad ki don tang u acting Syiem, kata u Bah Brilian Henry Syiemiong, hynrei ki kwah ban ioh noh da u Syiem ba pura. Kumta, ula kyrpat ia u EM ban buh noh da ka ilekshon, khnang ba kin ioh noh ia u Syiem bapura jong ka Hima.

U la ong ruh ba u Nongtei Sing Syiemiong uba ka Hima ka la dep ban sospon naduh u snem 2023 u la leh donbor palat. Kumta ki la dawa ba dei ban weng noh mardor ia u katkum ka jingkwah ki paidbah ka Hima Langrin. “Ngi leh ia kane da ka jingshaniah ia ka jingud jingiam ki khun ki hajar khnang ba ngin ioh ia u Syiem bad u nongsynshar ban peit bad khmih ia ka hok ki paidbah”, la ong u Bah Faindness.