Kyntu u Nongialam ka Liangpyrshah ia ka EC

U Nongialam ka Liang Pyrshah ha Khasi Hills Autonomous District Council (KHADC) u Bah Titosstarwell Chyne ula kyrpad ia ka Executive Committee (EC) ba ialam da ka Voice of the People Party (VPP) ba kan sangeh noh ban kynthoh shimet hynrei ka dei ban trei ban pynbha ia ka rukom treikam ka District Council. Haba kyrshan ïa ka Motion halor ka mat jong ka Non-Tribal Employee Clearance Certificate (NTECC) u Bah Titos ula ong halor ka jingkhynra ka KSU ha ka jaka jngohkai pyrthei ha Sohra’s Jiva resort ha kaba la lap ïa ki slip ba rong lieh bad rong pink ba la ai sha ki nongtrei bar Jylla. U Bah Titos ula pynpaw ka jingsngewsih ba uwei na ki Executive Member (EM) ka KHADC ula buh ha ka WhatsApp Status da ka jingthmu ban kynthoh pyrshah ia u shimet. U EM ula buh jingkylli balei ki Sengbhalang jong ka Sohra ki sngap jar haba u CEM u dei u MDC ka Sohra ula ai labour license ha u snem 2021. U Bah Titos ula pynshai ba um kwah ban kren halor katei ka mat mynshwa, hynrei mynta um lah shuh ban shu sngap jar. “U EM ha ka jingong jong u ha ka social media, ula pynpaw, “Shani ki nongialam sengbhalang jong ka Sohra ha ka por ba long CEM u MDC jong ka Sohra, ula ai ka labour license ha u snem 2021, Balei ngi dei ban shim ia kitei kum ki jingkynthoh shimet ?

Balei ngi pynlong ia kiei kiei kum ki jinglong shimet? Kaei ka jingdonkti jong nga ha ka jingkhynra ba la pynlong da ki sengbhalang, Phi sngew ka long kaba dei ban kynnoh ba nga la phah ia ki, wad kaei ba ki EC mynshuwa ki leh, lada ka long bakla ka dei ka kamram jong phi ban pynbeit ryntih ha ka jaka ban kynthoh shimet” la ong u Nongialam Liangpyrshah. U Bah Titos ula pynshai ka KHADC kam don bor shuh ban ai labour license hadien ba ka sorkar Jylla ka la pyntreikam ia ka ain ba iadei bad ki nongbylla bad Jylla. Ula pynshai ba ka Executive Committee (EC) ba mynshwa ka la ai ia ki non-tribal clearance certificate sha ki nongbylla bar Jylla, namar ba ki briew ki shaniah ha ka District Council ban tehlakam ia ka jingwan tuid jong ki nongbylla bar Jylla sha kane ka thain. Hynrei ula kubur ba ki don ki jingduna ha ka rukom treikam. U Bah Titos ula ban jur ba ka kamram jong ka EC ba thymmai ka long ban pynbha ia ki rukom treikam, ym ban kynnoh bad kynthoh iwei ia iwei pat.

“Haba ngi don ha ka bor, ngi leh ia kiei kiei da ka jingtip. Ngi sngewthuh ruh ba ka kyrdan jong ngi ka long ba shipor, bad kata ka por kan sa poi ba ngin hap ban plie lad ia kiwei pat, bad lada ki lap ia kaei kaba bakla ki dei ban sangeh. Kam dei tang namar ba kiwei ki leh ia kaei kaei, nga ruh ngan leh kumjuh. Lada phi tip ba ka long bakla, nga khmih lynti ba kito kiba wan hadien kin pynbeit ia ka” ula ong. U Nongialam Liangpyrshah ula kyntu ia ka District Council ba kan leh ia kaba dei ha kaba iadei bad ka kam labour license khnang ba kan nym buh ia ka Council ha ka jingshah kynthoh. Ha ka jubab ia ka jingkren u Nongialam ka Liangpyrshah u CEM u Bah Winston Tony Lyngdoh u la pynpaw ba um shym la kynnoh pyrshah ia u hynrei u shu pynpaw ba la pynmih ia ka NTECC ha ka por ba u long CEM. U la pynshai ka jingkren jong u kam dei ban pynjah burom ia u Nongialam ka Liangpyrshah hynrei ban ai ia ki jingshisha bad ban pynshai ba ka NTECC ka la sdang ha ka por ba u dang bat ia ka shuki CEM.