T.1000 klur man u snem iarap ka sorkar ia ki skul shimet, Adhoc bad Deficit

U Myntri Rangbah ka jylla u Conrad K Sangma ryngkat bad u Symbud Myntri Rangbah ka jylla u Bah Prestone Tynsong uba long ruh u MLA ka Pynursla Constituency hynne ka sngi, ki la pynhap pyrda ia ka jingrakhe ia ka Jubili Rupa ne ka jingdap 25 snem jong ka Higher Secondary Section jong ka skul St Anthony’s Higher Secondary School, Pynursla.Ha kane ka jingialang la iadonlang u Myntri Sorkar u Bah Sanbor Shullai, ka MDC ka Nongshken ka Kong Grace Mary Kharpuri, ki nongpyniaid jong ka skul, ki heh ophisar sorkar bad kiwei kiwei kiba la shah khot sngewbha. Haba kren ha ka jingialang u Conrad K. Sangma ula ong, ba ka sorkar ka buh hakhmat eh ia ka pule puthi ba kan long salonsar bad ban kyntiew ia ki jaka pule kiba don ha kylleng ki bynta jong ka jylla Meghalaya khamtam ia ki jaka pule kiba don ha ki thain nongkyndong.Ula iathuh ba haduh 15 percent na ka bhah tyngka ka jylla mynta u snem la mang T.3,654 klur ia ka pule puthi bad ka dei ka mang tyngka ba heh duh hapdeng ki tnad sorkar bad ula ong ba ka Meghalaya ka don palat 14,000 tylli ki skul kiba kyrshan da 55,000 ngut ki nonghikai bad kumba T.1,000 klur la pynlut man la ka snem ban ai ia ki Grant sha ki skul Private, Adhoc bad Deficit School.

“Ngi sngew sarong ia kane ka jingbei tyngka bad dei namar katei ba ka pule puthi ka la kiew shaphrnag, watla ngi dang mad ia ki jingeh kum ka jingkiew ka jingiehnoh shiteng por ia ki skul bad ka jingduna ha ka jingpass bha ki khynnah” ong u Conrad.Ha kaba iadei bad ka jingai jingkyrshan ia ki skul shimet, u Myntri Rangbah ula ong, “Ka sorkar kan ai jingkyrshan pisa kaba naduh T.50 lakh haduh T.1 Klur sha ki katto katne ki skul kiba la shah jied kiba don ha kylleng jong ka jylla ban kyntiew noh ia ki sha ka Higher Secondary”. “Kane ka scheme ka dei kaba la pynwandur ban iarap ia ki jaka pule ki bym dei ki jong ka sorkar ban kyntiew ia ki jingdon jingem bad ia ki jait jingpule ha ki Stream ki bapher bapher” la ong u Myntri Rangbah bad ka pynthikna ba ka St. Anthony’s Higher Secondary School, Pynursla, kan long ka skul kaba nyngkong kaban ioh ia kane ka jingiarap bad ka pynbna ruh ban ai jingiarap T.35 lak ia ka skul lyngba ka CMSDF. Ula ai khublei ruh ia ka skul halor ka jingdap 25 snem ha ka jingtrei minot ha kaban ai ia ka jingnang jingstad kaba paka bad ula iaroh ia ka skul kaba la iengskhem ban saindur ia ki khynnah ha ka liang ka pule puthi bad ha ka akor ka burom.

 Nalor kane ula iaroh ia ka kam bakhraw kaba la leh da ka Salesians of Don Bosco ha kaban pynwandur ia ka pule puthi ha ka jylla bad kila noh synniang ruh ia ka thain bad ia ka ri.Katba u Bah Prestone Tynsong ula ong ba ka jingiaid lynti kaba 25 snem ka St. Anthony’s Higher Secondary School kam dei ka kamkai bad u ngeit skhem ba kan dang iaid shakhmat ban ai ia ka jingnang jingstad kaba bha tam ym tang ha Pynursla hynrei ia ka thain Ri War baroh kawei.Ula ong, ba ka tnad pule puthi kala leh bun ki kam bad ki dang bun kiei kiei kiba kadei kaban dang leh nangne shakhmat bad ula ong ba ka sorkar jylla kala bhah tyngka bun bha ia ka liang ka pule puthi kaba kot haduh T.3654 klur tam bad hapoh ka jingialam u Myntri Rangbah ka jylla u Conrad K Sangma yn sa iohi ia ka jingkylla ha ka pule puthi. Ha kane ka jingrakhe la pynkup burom ia ki nongseng ia ka jaka pule, ki nonghikai kiba la hikai nyngkong bad ia ki samla pule kiba la pule nyngkong eh ha kane ka skul bad la pyniphuh iphieng ia kane ka jingrakhe da ki jingrwai, jingshad bad ka jingak drama kaba ki khynnah skul kila pyni ia la ka sap ka phong ka jongki.