Plie u MLA ia ka ïing sah ki kynthei ba ïakynduh jingeh ha Nongstoin

Ka District Social Welfare Department ha ka jingïatreilang bad ka Life Light Focus Concern ka plie ia ka Iingsah na bynta ki kynthei ba kynduh jingeh ne ka Shakti Sadan Home ha Mawpun, New Nongstoin, West Khasi Hills District. Hapoh ka jingprat lynti u Bah Garod L.S.N Dykes, IAS, Deputy Commissioner kum u Chairman bad Kong DW Pakyntein DSWO, Member Secretary ka long ka jingmyntoi shibun ia ka district bad ka bynta ba kongsan ban pynkhlaiñ ïa ka jingïarap ka District na bynta ka bha ka miat jong ki kynthei. U Bah Gabriel Wahlang, MLA, u la long u Kongsan bad u la plie ïa kane ka Ïing, ha ka jingïadonlang jong u Bah C.P. Mawkhon, MCS, ADC, Kong D. W. Pakyntein, DSWO, Rev. I. Dura, Bah A.S. Dohling, Secretary, Life Light Focus Concern, bad kiwei pat ki riew rangbah.

Kum ban shu kdew hangne ba ka Shakti Sadan ka dei ka ïing pynïasoh bad pynim biang (integrated and rehabilitation home) hapoh ka Ministry of Women and Child Development. Ka thong jong kane ka ïing ka long ban ai ka jaka sah kaba shngaiñ, kaba skhem bad kaba pynpaw jingkyrshan ïa ki kynthei kiba ïakynduh jingeh. Ka Shakti Sadan ka ai jingïarap ïa ki kynthei kiba la shah ktah ha ki jingïakynduh jingeh bapher bapher kum ka jingeh ha ïing ha sem, ka jingïakynad bad ki ba haïing, ka jingrung ha ka jingkhaii briew (trafficking), ne ka jingduna ha ka jingïarap ha ka ïoh ka kot. Ka Centre ka ai ka jaka sah shipor, ka jingai jingiarap ha ka liang jingmut jingpyrkhat, ka koit ka khiah, ka jingiarap ha ka aiñ, bad ka jinghikai ïa ki sap ban im ha ka jingim. Ka thong ka long ban pynsuk ïa ki kynthei ban ïoh ïa ka jingim kaba dap da ka burom, ka bor ha lade,bad ka jingsynshar ha ka jingim jong ki. Kito kiba wan sha ka Shakti Sadan ki dei kiba la phah da ka Police Department sha ka One Stop Centre (OSC) na ka bynta ka jingpynbeit jingim (institutionalization).

Hadien ka jingpynlong ïa ka jingleit jngoh ha ki iing ki sem ryngkat ka jingiarap ha ka liang ka jingmut jingpyrkhat ka OSC, ki nongwan sah kin sa phah sha ka Shakti Sadan. Na ka bynta ka jingïalam bad ka jingïakhmih (supervision and monitoring) ïa ka Shakti Sadan Home, Mawpun, New Nongstoin, la thaw ruh ïa ka Adhoc Committee kaba kynthup ïa ki dkhot, ADC (I/C Social Welfare) Chairperson, DSWO (District Social Welfare Officer) – Convener,Nongmihkhmat na ka Health Department, Nongmihkhnat napoh ka ophis u Superintendent of Police, SDO MSSDS Nongstoin, Nongmihkhmat na ka Life Light Focus Concern. Kane ka treikam noh syndon bad kan bteng beit kumne tat haduh ban pynmih da kawei pat ka hukum kaba thymmai.