Ka Kynthem Deiriti da ki Khanatang

Ka Shillong Literary Festival, ka ba long naduh 20tarik haduh 22tarik Naiwieng 2025, ka la plie wang ia ka khep ban rakhe jia ki jingtbit ha ka pyrkhat, ka thoh, ka thaw lade bad ha ka ba ia pur khana halor ki deiriti tynrai. Laisngi lynter ka rong ka taw ka tyrwa ia ka kynthem jong riti tynrai ha ka thoh ka tar, naduh ka ba pyllait kot thymmai, ka ba jurip ia ki kot ba la dep pynmih, ka ba iatai bad ki riewtbit ha ka thoh ka tar bad ka pur khana marmet bad ki nongthoh. Ki nongthoh ba pawkhmat na jylla ki la ioh lad ba syllok bad ki khlur thohkot jong ka Ri India ban ia sam lem la ki jingtip bad jingtbit ha ka thoh ka tar. Ha lyndet kita ki kam ki ba sani, ka rong ka taw ka la phuh la phieng ruh da kiwei kiwei ki lat ki ba khring paidbah. Ki don ki basa die kot, ki ba kynshew ia ki kot thymmai bad ki kot ba kynsai na kylleng, katba ki snap rikynti la pyninam ha la ki basa ba la mang khnang ban ioh khmih kai ki paidbah ia ki mar kordor jong ka thoh ka tar. Hynrei kaei ka ba la khring kham kyrpang ka dei ka jingiathuh khana sawdong ka lyngwiar dpei ka ba la pynwandur katkum ka juk hynrei la ptnneh ia ka thymmei jong ki khanatang, haduh ba la pyrto ki paidbah ki ba shahshkor ban iohsngew ia ki khana tynrai jong ki paidbynriew ka jylla.

Ka ba la pynkyndeh ia ki paidbah dei ki sur phawar ha ryngkat ki ksing ki dhah ba la tem bad rwai da ka kynhun Khasi Cymru Music, ka ba la byrshem ia ki snap ka phawar bad ka khnatang ba la iathuh. Ki dkhot jong kane ka kynhun ki dei ki riewtbit ba la pule ia ka surrwai surtem tynrai Khasi ha ka ba ki la pyninam ha kylleng ka jylla bad ka Ri India, bad dang shen ki la wanphai na Ri Wales ban pyninam ia la ki sap ki phong ha ka surrwai surtem. Shibnai lynter ki la dep pyninam ha Ri Wales ban shem ia ka jingiadei hapdeng ki Khasi bad ki Welsh ha ka sanriti jong ki artylli ki Ri. Ki dkhot jong kane ka kynhun surrwai surtem ki long u samla Aijingkmen Janong, Balasiewdor Ryntathiang, Nangteidor Nongkhlaw, and Risaka Nancy Pyrbot. La bynrap lang ruh da u Bah Banjop Leo Kharmalki, u tyngshop bad nongthoh ba shitrhem jong ka jylla u ba la shim bynta kum u tyngshop kongsan ha ka durim Apot ka ba la shah jied dang shen ban pyninam ha ka tamasa durim 31st Kolkata International Film Festival.

Ka jingiathuh khana ba myllung la sot na ka kot ba la jer KOT- Khasi Old Testament, ba la thoh da u bah Raphael Warjri ka ba dei ka khanatang naduh ba thaw ia ka pyrthei haduh byllai ki puriskam purinam ki ba don ha ka imlang sahlang Khasi. Ki riewtbit ban iathuh khana ba pynmyllung bad shem mynsiem ki long ka kong Fatima Nongbri bad Lucetta Syiem, ki ba la iathuh khana bad pynshai ruh hateng hateng khnang ba ki briew ba ym dei Khasi ki lah ban peiphang shaphang ka nongrim jong ki khanatang Khasi. Ki khanatang ba kongsan ki long ia ka ba thaw ia ka pyrthei naduh ba mih nyngkong ka sngi, u bnai, ka lyer ka um ka ding kum ki bor tynrai ki ba la kyrsoi ia baroh ki jynthaw ha pyrthei. Ha ka sngi khatduh yn ai da ki khanatang shaphang ka ba thaw ia ka pyrthei katkum ka riti dustur khanatang jong ki paidbynriew Garo. Ha kane ka jingiathuh khana yn sa pynsawang ruh da ki sur jong ki ksing ki dhah na ka kynhun Shillong Achik Cultural Artistes Association ka ban byrshemm ia ki sur tynrai Garo bad ki khanatang shaphang ka ba thaw ia ka pyrthei.