Sdang ka DERT ban ai jinghikai pyntbit ia ki nonghikai LP

Ka Directorate of Educational Research & Training (DERT) mynta ka sngi ka la plie ia ka Certificate Course ba hynriew bnai na ka bynta ka ‘Foundational Stage’ kaba dei na bynta ki nonghikai bym pat pyntbit kiba dang don ha ka kam hikai naduh ka pre-primary haduh ka klas II ha DERT, Nongrimmaw, Laitumkhrah, Shillong. Haba kren ha ka jingialang u Myntri ka tnad pule u bah Lahkmen Rymbui ula ban jur ia ka jingdonkam ban don ia ki jinghikai ba man ka por ka ban iaid ryngkat ka rukom hikai kaba la nangkiew stet. “Ngi donkam ym tang ia ka kyrdan pule, hynrei ngi donkam ruh ia ka jingpyntbit. Ka rukom hikai mynta ka donkam ban pynleit jingmut bha, ngi dei ban long kiba la pynkhreh na ka bynta kino kino ki jingkylla”, ula ong.U Rymbui ula pynpaw ïa ka DERT kum ka tnad ba kongsan ka jylla na ka bynta ban ai jinghikai ïa ki nonghikai, khamtam haba ka Ïingbishar ba ha khliehduh ha ka 1 tarik u Nailur 2025 kaba kdew ïa ka Teacher Eligibility Test (TET) ka long kaba donkam.

U la kdew ryngkat ka TET, ki nonghikai ki dei ban long kiba la pyntbit bha. “Ha kine ki ar snem, lada ka Supreme Court kam pynkylla ïa ka rai jong ka, ka sorkar kan wad ki lad ki lynti ban kyrshan ïa ki nonghikai ba dang trei da kaba pyntbit kum ki nonghikai. Ka bynta jong ka tnad pule bad ka DERT ka long kaba donkam,” ula bynrap. Haba pynpaw ia ka rukom treikam “mission-mode”, u Myntri ula kam ka jingpynlong ia kane ka jinghikai ka la sah teng hynrei ula sngewnguh ia ka jingkhih ba dang shen, da kaba kdew ba ar tylli ki training courses la pyntreikam ha ka taiew ba la dep. U la pynpaw ka jingsngewnguh ïa ka kynhun myntri kaba la mynjur ban thaw ïa ka Meghalaya Teachers Training Academy, ka ban ïatreilang bad ka DERT.

U Rymbui ula pynpaw ia ka jingdonkam ban pynthymmai ia ki rukom hikai man ka por ryngkat ki jingdonkam ha ka pule puthi kiba kylla na ka por sha ka por. Haba pynksan ïa ka jingdonkam ban pynkhreh ia ka lawei ki khynnah katkum ka juk teknoloji, ula ong, “Ka AI ka dei ka lynti ban ïaid shakhmat. La ngi kwah ne em, ngi dei ban pynïasoh ïa ka AI ha ka jinghikai.” Wat hapdeng ki jingduna ha ki jingtei, u la kyntu ia ka DERT ban wad ki lad ki lynti ban pynrung ia ka AI naduh ka Klas III shaneng. Ula ong kum u myntri ka tnad pule bad u Myntri Rangbah ka Jylla u Conrad K. Sangma ki don ka jingangnud ban pynkylla ïa ka tnad pule puthi ban pynthikna ba ki skul kin ïoh ki nonghikai katkum ka jingdonkam jong ki. Ha ka jingialang la donlang ka Director DERT ka R.S. Manners, u bah R. Rapthap, ki ophisar ka tnat bad kiwei kiwei.