Iakynduh u Myntri Wailad ia ki samla ban leit kynduh ia ka President ka Ri

Shwa ba ki khun samla pule ka West Jaiñtia District kin mih mynta ka sngi na Jowai ban leit iakynduh ia ka President ka Ri India ha nongbah Delhi bad ruh ban sakhi ia ka Winter Session ha Parliament, lyngba ka Exposure Trip ba la pynkhreh da ki bor district ka West Jaiñtia Hills, u myntri ka koit ka khiah bad sport ka sorkar jylla u Wailadmiki Shylla ula iakynduh ia ki khynnah maynta ka sngi ha conference hall ka ophis u Deputy Commissioner, West Jaiñtia Hills.  Kine samla pule ba la shah jied ban leit kynduh ia ka President ka Ri dei kiba la jied kyrpang lyngba ka jinglah jong ki ban poi  shakhmat ha ki jait jingiakop bapher bapher ba la pynlong da ka ophis u Deputy Commissioner ha ki bnai ba la dep, bad baroh ki don kumba 17 ngut.

Ha kane ka jingiakhynduh iakren u Myntri la donlang ruh u DC ka West Jaiñtia Hills u Abhinav Kumar Singh, IAS, ka SDO Sadar Jowai ka Vevotolu Kezo, IAS, u F. Passah Assistant Commissioner MCS. U Wailadmiki Shylla haba kren u iaroh ia u DC halor ka jinglah jong u ban pynurlong ia kane  ka sienjam, bad iaroh ruh iaka SDO Sadar Jowai kumjuh baroh ki nonghikai skul kiba la don bynta ban ai mynsiem iaki khynnah skul ba kin shim bynta shitrhem. U Deputy Commissioner Abhinav Kumar Singh u ong ia kane ka sienjam ula shim dei lyngba ka jingiamir jingmut jong u bad u Myntri Wailadmiki Shylla naka bynta ban plie lad iaki khun samla ba kin sngewthuh khambha iaka lawei ka ban iarap ruh iaki ban sngewthuh iaka bor jinglah lade.

Ha kane ka Exposure Trip ki samla pule kin kin iohlad ruh ban iakren iamir jingmut  bad ka President ka Ri. Nangta kin leit sha Rashtrapati Bhavan bad Museum, kin leit sakhi ruh iaka live session jongka Parliament bad jurip iaka Nehru Planetarium.