La donkam ia ka Kolej Tourism na bynta samla pule, ong Dr WR Kharlukhi

Ka lynti iaid kjat ba don haduh 543 tylli ki mawkyndon ban kiew ha ka jingjrong kumba 230 meters, 5 phut ka jingiar kaba don ha Caroline Colony Jowai ba pyniasoh na ka surok Myntdu By Pass ban mih ha Lad College Kiang Nangbah la plie paidbah hynnin ka sngi da u MP ka Rajya Sabha u Dr. W.R. Kharlukhi. Ia kane ka lynti iaid kjat la ai jingiarap lyngba ka MPLADS skhim u snem 2023-2024 ha ka mang ba 10 lak tyngka. Ha kane ka sngi plie u Waheh shnong Caroline Colony u Embhahlang Lyngdoh ula  iathuh la bunsien ka shnong ka la pyrshang pan skhim na ka tnat sorkar ban shna ia kane ka lynti kjat hynrei ki khlem ioh, kumta u pynpaw ka jingsngewnguh ia u Dr. W.R. Kharlukhi uba la kloi ban iarap na ka bynta kane ka jingangnud ba la slem jong ka shnong.

U Advicer ka shnong Caroline Colony u M.S Lhuid haba kren ula pynsngew ia ka jingiaid lynti jong ki ha ka ban peit bniah bad pynkhreh ia ka mang pisa na ka bynta kane ka lynti khnang ban pynsuk bad pynjan ia ka iaid ka ieng hapdeng ki para nongshong shnong kiba shong shatrai ka lynti bad kiba sah shalor. U Dr.W.R. Kharlukhi haba kren u ong ia ki nongshong shnong ka Caroline Colony ba kim donkam ban ai khublei ia u namar dei ka kamram jong u ban leh bha pat ia ki kum ki paidbah kiba la ai jingkyrshan ban pynkup ha u ia kane ka kyrdan.

Kumba long mynta u ong, ka skhim ba ula pyrshang iaid lynti dei ka College of Tourism khnang ba ki khynnah jong ngi  kin ioh leit pule,  namar ula iohi ba ka tourism dei kaba iarap bha ia ki khynnah ym tang ha ka Jylla jong ngi hynrei wat shabar ka Jylla bad ka Ri,  da kaba u ai nuksa ia kiba la dep pule bad trei shabar.  Kumba bun ki khun samla ki ud ia ka jingbym ioh kam, u ong imat la dei ka por ba ym dei ban khmih lynti tang ha shnong hynrei ban wad lad leit trei shabar ruh, nalor ban don  ka mynsiem nud tur shaphrang.