Kim pyntreikam ïa ka MRSSA), 2016 ba ki kwah tih dewiong

Ka jingbym pyntreikam ka sorkar jylla ia ka Meghalaya Residents Safety & Security, Act (MRSSA), 2016 ka dei namar ba ka kwah ban don ka jingtih bad shalan beain ia u dewiong ha ka jylla. Ia kane la ong u nongialam ka liangpyrshah u Dr. Mukul Sangma haba kren sha ki lad pathai khubor ha kane ka sngi Saitjain. U Dr. Mukul ula ther ia kane ka sorkar ka bym lah ban shimkhia bad kaba la thok ia ki paidbah haba iadei bad ka jingbym lah ban pyntreikam ia ka MRSSA. Halor ka jingthmu ka sorkar ban bsuh ia ki kyndon ba iasyriem kum ka ILP ha ka Immigration and Foreigners Act, 2025, u Dr Mukul ula ong ba ka Inner Line Permit (ILP) kam dei ka mat kaba hap ha ka jingpeit jong ka sorkar jylla hynrei ka shong ha ka sorkar pdeng.

U Dr. Mukul ula pynkynmaw ba ha ka por ba u dang don ha ka sorkar mynshwa, um shym la kular ban pyntreikam ia ka ILP kumba kular kane ka sorkar MDA mynta, hynrei ula shim da kawei ka sienjam ban pyrkhing ia ka jingwan rung kyrtlep ki briew nabar, da kaba wanrah da ka ain Meghalaya Residents Safety & Security, Act (MRSSA). Hynrei kane ka sorkar kaba ialam ka NPP mar synwan ha ka bor synshar ha ka jylla, ha jaka ban pyntreikam ia ka ain MRSSA, ka la wanrah ka jingpynkylla pynban khlem pat pyntreikam. “ Nga tip bad ngam lah ban ai jingkular manga na ka bynta ban pynkohnguh ia ka sorkar pdeng bad nga leh ka ‘Homework’ bad nga la pyrshang ban wad jingtip, la kin mynjur ban ai ia ka ILP, hynrei haba nga tip ba kim pdiang, ngi la wad da kiwei ki lad ki lynti bad ngi la wanrah da ka ain MRSSA. Hynrei kane ka sorkar ka la shu kular thok ia ki paidbah bad kam shym la lah ban pyntreikam ia ka Meghalaya Resident Safety & Security, Act (MRSSA),” ong u Dr. Mukul. Katkum ka jingong u Dr. Mukul, ynda la pyntreikam ia ka MRSSA, ki kor CCTV ha shi lynter jong ki surokbah ki hap ban ieng, khnang ban pyntikna ban don jingshngain jong ki paidbah. Hynrei kane ka sorkar kam shym la pyntreikam namar ba ka sheptieng ioh ym lah shuh ban shalan beain ia u dewiong, la kynnoh u Dr Mukul.

“Mar ia pyntreikam ia kane ka ain MRSSA, kan nym don shuh ka jingshalan dewiong beain namar kane ka ain ka long ka khmat bad ka skhor jong ki bor sorkar, namarkata kane ka sorkar ka kwah ba khapbrip ia la ki khmat bad kim kwah ban ioh sngew. Namar lada ki bor ba dei khmih, ki tip ba don ka kam beain bad lada kim leh eiei, la shah pynhap ha ka jingpynkhein ia ka ain jong ka ‘India Prevention Corruption, Act,1988’.” Ha kajuh ka por, ula ong ba kane ka sorkar kan sa kam ba kan sa leit rah ia kane ka mat sha ka sorkar India bad kin sa kam ruh ba ha hadien ka ilekshon 2028, kin sa iakren bad ka sorkar India. Hynrei kine baroh kin nym urlong namar u paidbah ka jylla udei uba stad.