Kynduh jingeh ki paidbah ban leit ban wan ba shna pynheh surok Shillong-Dawki

Ka jingshna pynheh ia ka surok Shillong-Dawki ka la wanrah shibun ki jingeh ia ki paidbah ha ka leit ka wan la shi snem kynthih namar ba ki hap ban iaid katkum ka por ba la buh khnang ban ai lad ia ka kompeni shna surok ba kan ioh ban tih mon khlem jingpynwit.
Kane ka dei ha ka bynta narum Laitlyngkot shaduh Lyngkyrdem jong ka surok Shillong-Dawki, ha kaba ia ka bynta ka Pynursla Civil Sub-Division ka la pynjari da ka pali ban iaid ki kali ha ka por mynstep bad janmiet. Khnang ban lait na kano kano ka jingma bad ka jingthut ban tih ia kane ka bynta ka surok, ka SDO ka la khang ban iaid kali naduh 11:30 mynstep haduh 4 baje janmiet man ka sngi bad 9 baje janmiet haduh 4 baje mynstep.
Ha kine ki bnai ba la slap, la sakhi ba ka leit ka wan ka la buh jingeh bha namar na ka jingsynjor ka khyndew bad ki maw bad ka la don ruh ka jingjia ba sngewsih.
Ha ka jingiaid lynti ha kane ka sngi sha katei ka surok, la iohi ba ka kompeni ka la trei shaid shaid bad don ruh ki bynta ba ka la dep ban pynheh bad don kiba la siang rong bad kane ka la pynsuk khyndiat ia ka leit ka wan. Hynrei kiba bun ki bynta ki dang shah shrah ban tih namar ba katei ka bynta ka dei kaba riat bad kaba khim.
Ha ka jingiakren bad ki katto katne ki briew, ki la pynpaw ba ban ia nujor bad mynshem snem, ka la kham biang mynta namar ba don ki bynta ba ka kompeni la shna pynheh hynrei ki don pat ki bynta kiba dang long ma kiba khim bad ki la sngew ba ka kompeni ka dei ban shna bha ha kito ki jaka ban suk ka leit ka wan katba ki dang tih ruh ha kajuh ka por.
Ki la kyrmen ba shwa ban wan ka aiom lyiur, kane ka kompeni kan lah ban pyndep khamtam ha ki jaka kiba kham long khnang ban ym don shuh ka jingkhang iaid kali.