Hiar jurip u MLA ia ka skhim GMCWSS, kyrmen ban dep hapoh u 2026

U MLA ka Mawkyrwat, Bah Renikton L. Tongkhar ula pynpaw ia ka jingkmen kaba khraw ban lap ba ka jingpyntrei ia ka Greater Mawkyrwat Combine Water Supply Scheme (GMCWSS), ka projek sam um kaba heh tam hapoh South West Khasi Hills District ka lajan dep ha kaba ka jingiaid jong ka kam ka la poi sha ka 90 percent.

Ia ka Greater Mawkyrwat Combine Water Supply Scheme (GMCWSS) la bei pisa haduh T.59 klur lyngba ka Jal Jeevan Mission (JJM) bad kane ka projek kan ai um sha ki 8 tylli ki shnong kiba kynthup ia ka shnong Mawlangwir, Mawten, Mawkyrwat, Wahsiej, Sohkhyllam, Mawmerang, Nongeitser bad ka Hillan.

Mynta ka sngi u Bah Renik ha ryngkat ka jingsynranlang da u Executive Engineer (EE) jong ka tnat PHE, Mawkyrwat Division, South West Khasi Hills District, Bah K. Nongbsaw bad kiwei kiwei pat ki ophisar na ka tnat PHE, ki la leit ban jurip ia ka jaka pynkhuid um (Water Treatment Plant) jong ka GMCWSS kaba don ha ka shnong Mawten, 2 KM na Mawkyrwat.

Haba kren sha ki lad pathai khubor, u Bah Renik u la pynpaw ia ka jingsngewkmen ba ha man ba u wan jngoh, la iohi ia ka jingiaid shaphrang jong ka kam bad mynta ka la jan sha ka jingdep ba janai bad sah sa tang katto katne ki bynta ba dei ban pyndep. U la kyrpad ia ki contractor ba kin sngewbha ban pyndep ia la kijong kijong ki bynta da kaba shim lem ia ka jingkitkhlieh na ka bynta ka kam, bad u la iathuh ruh ba shen ka Sorkar India kan sa pyllait noh ia ka pisa na ka bynta ka skhim JJM.

Ha kawei pat ka liang, u bah Renik u la pynpaw ia ka jingkmen khamtam eh ban iohi ba ka tyllong um jong kane ka skhim ka biang bha bad kumta u kyrpad ia ki paitbah ha ka thain Wahsiej-Sohkyllam ba kim dei ban pynjot ne pom pathar ia ki dieng khnang ba ka um kan neh bad kan lah ban bsa ia kine ki 8 tylli ki shnong baroh shisnem.

Na ka liang jong u EE ka tnat PHE, u Bah K. Nongbsaw u la iathuh ba ka jingiaid jong ka kam mynta ka la poi sha ka 90% bad na ka liang jong ka tnat PHE ka la buh ia ka thong ban pyndep ia kane ka skhim hapoh u snem 2026.