Dawa ka JNC ban tohkit halor ka jingïoh rung ki nong Bangladesh

Ka seng Jaintia National Council (JNC) ka la dawa ba ka sorkar jylla bad ka sorkar pdeng ka dei ban wanrah noh da ka small scale Scientific Mining bad kadei ban tohkit halor ka jingioh rung ki khar Bangladesh ban wan trei dewiong beain ha kane ka thain. Haba kren sha ki lad pathai khubor,.u President ka JNC u bah Sambormi Lyngdoh ula ong ba ka jingtrei dewiong ha Thangsko, ka long kaba laitlan bha haduh ba ki iohlad ban wanrah ia ki nongtrei bar jylla na ri Bangladesh. U bah Sambormi ula ong ba ka jingiap ki nongbylla na ka jingbthei ka par dewiong  ha Thangsko, kam dei shuh kaba shu jia khlem poi pyrkhat, hynrei la kynnoh ba ka lah ban don eiei sha lyndet. ” Ngi kiba sah ha East Jaintia, ka kam tih dewiong, ka ladei kawei na ki lad kamai jakpoh jong ngi bad kum kine ki jingjia ki ju jia hynrei ki shu khlad wei arngut.

Hynrei kane ka jing jia mynta ha Thangsko ka long kaba kham itriem bad ym pat ju jia. Ngi kum ka seng ngi sngew kumba don eiei sha lyndet,” ong u bah Sambormi. Ka seng ka la dawa ba ka sorkar kam dei ban thung jingtohkit tang halor ka jingtih beain ia u dewiong hynrei kadei ban tohkit ruh halor kumno ki nongtrei bar jylla na Bangladesh ki poi trei beain ha katei ka jaka. Ha kajuh ka por, ka seng ka la dawa ba ka sorkar kadei ban kyndang ia ki briew kiba wan sah beain ha katei ka jaka. ” Ban shu khang ia ka jingtrei dewiong, ka long kaei kaei ka bym lah ban long namar bun ki briew ha katei ka thain ki im ja na katei ka kam, namar kata ka sorkar kadei ban wanrah da ka small scale scientific mining,” ong u bah Sambormi.

Ka sorkar India kam dei ban kut tang ha ka jingphah khubor pynrem bad ban siew bai buria sha kitei ki lanot, hynrei kadei ban wad ban wanrah ia small scale Scientific mining khnang ban wanrah jingmyntoi ia u paidbah, ula ong. Ula bynrap ba lada don ka jingtih beain ia u dewiong, ka don ka jingduhnong ia ka sorkar namar ka duh ia ka khajana. Hynrei lada ka jingtih dewiong ka iaid katkum ka ain, ka sorkar jylla ruh kan sa iohnong na khajna.