U Myntri Rangbah ka jylla u Conrad K. Sangma, ula pyntip ba ki don 36 ngut ki Consultant riew shimet bad 59 tylli ki Consultant kompeni bad ia kine ka sorkar ka la siew katkum ka jingiateh kontrak bad ka jingsiew shisnem ka long kumba T.4.35 klur ha u snem 2024-25. Ia kane u Myntri Rangbah ula pyntip ha ka kynta kylli jingkylli ba la wanrah da u MLA ka VPP na Mawryngkneng u bah Heavingstone Kharpran hynne ka sngi ha iing Dorbar Thawain ka jylla. U Conrad ula iathuh ia kine ki Consultant shimet la thung da ka interbiw bad ki eksam, katba ia ki consultant kompeni la thung da kaba aplai lyngba ka tender.
Ia kine ki consultant la pyndonkam tang ia ki project kiba ioh na bar ne ki Externally Aided Project (EAP) ha kaba ka jylla ka la ban pynioh kumba T.12,000 klur bad ka jylla Meghalaya ka dei ka jylla kaba ioh heh tam napdeng ki jylla barit ha ka thain Lammihngi.U la iathuh ka jingsiew sha ki 59 tylli Consultant kompeni ka la kot T.131 klur bad na kane T.116 klur ka dei na ka Administrative Expenditure, na ka jylla ka la pynlut haduh mynta kumba T.10. 75 klur bad na ka sorkar Pdeng la pyllut kumba T.5 klur tam eiei. Ula ong ba ki projek ba ka sorkar ka ioh lyngba kine ki Consultant Agency, ki dei kiba heh bha bad kumba 99.9 percent ki dei ki samla kynthei bad shynrang ka jylla, kiba trei ia ki projek bapher bapher.
Ha kane ka jingkylli, la iashim bynta ki MLA ban buh jingkylli naduh u Nongialam Liangpyrshah u Dr. Mukul Sangma, u bah Ardent M Basaiawmoit, u bah Brightstarwell Marbaniang, bah Adelbert Nongrum.Ula pynshai ba ki Consultant ki dei kiba tbit ha ki jait kam bapher bapher katkum ka jinglong ka kam, kum kiba iadei bad ka mariang, kiba iadei bad ka rep ka riang, kiba iadei bad ka um ka wah bad kumta ter ter.“ Kine ki consultant ki dei kiba hap ban bud katkum ki kyndon jong ki project kiba wanrah nabar,” ula ong.