Ha ki san snem 658 ioh bat ka sorkar ia ki nong Bangla, phah leit noh ia 194 ngut

U Symbud Myntri Rangbah ka Jylla ba peit ia ka kam Pohiing u Bah Prestone Tynsong hynne ka sngi Ba-ar ka Dorbar Mang Tyngka ula iathuh ba la ioh kem 658 ngut ki nong Bangladesh bad la pynphai noh ia 194 ngut hadien ka jingtohkit bad pynshitom. U Bah Prestone haba jubab ia ka ‘Call Attention Motion’ ba la wanrah da u MLA ka Mawryngkneng u Bah Heavingstone Kharpran ula ong, ka Sorkar ka la buh ia ki Anti-Infiltration Directorate bad ki District Police Unit ha ki jaka ba donkam bad ki don 18 tylli ki Anti-Infiltration Check Post, ki Check Gate bad ki Land Custom Station ha ki thain khappud Inter-State bad Indo-Bangladesh. Nalor kane la thaw ruh ia ki 11 tylli ki District Task Force ha baroh ka jylla ban peitngor ia ki kam sniew bad ki briew ba wan rung tuh.

U Bah Prestone ula ong, naduh u snem 2021 haduh ka 3 tarik u Rymphang 2026, la ioh bat 658 ngut ki nong-Bangladesh ba rung be-ain bad la pynshitom katkum ka aiñ bad la phah leit phai noh ia ki 194 ngut sha Bangladesh hadien bad ba la ioh ia ki Travel Permit na ka Embassy ka Bangladesh ryngkat ka jingpynsaja ktakum ki kyndon ain. U la pyntip ka sorkar ka la pyntreikam ia ka MRSSA, 2016 ha ki katto katne ki jaka ha East Khasi Hills bad ula kyntu ia ki nongshong shnong bad ia ki sengbhalang ba kin iatreilang bad ki bor sorkar. U Bah Prestone ula iathuh ka Sorkar ka la thung ia ka State-Level Committee ba kan peitngor ia ka jingpynithuh bad jingpynphai ia ki mynder ri ba sah tam ia ka por. Ka Meghalaya Resident Safety and Security Act, 2016, mynta ka la treikam ha bun ki jaka ka East Khasi Hills ryngkat ki kyndon jong ka Immigration and Foreigners Act, 2025, ka Bharatiya Nyaya Sanhita bad ki kyndon ka Ministry of Home Affairs.

U Bah Prestone ula pynshai ia ka jingjia ha ka 15 tarik u Nohprah 2025 ha Thangshalai Bypass, ba ki la don ki briew ba suba ki dei kiba wan rung be-aiñ kiba shong ha kawei ka kali (ML-11-B-7533) bad ki pulit ki la leit talasi bad la lap ba ki 7 ngut dei ki nongshong shnong ka Dhubri District, Assam kiba thmu ban leit bylla shna iing sha Sookilo, East Jaintia Hills. Ha ka jingtohkit, la lap baroh 7 ngut ki dei ki nong-India bad ki don ruh ia ki Labor License ba la ioh na u kontraktor bad la pyllait noh ia ki. U Bah Prestone ula ong ba u nongniah kali bad kine ki nongbylla kila shah shoh bad la ialam sumar noh ha Mawryngkneng CHC bad na ka liang ka Iatylli Lang Drivers’ Association ka la ujor ejahar bad ka jingtohkit ka dang iaid shakhmat.