Khlad kyndit u MP Dr Ricky Syngkon, ka jingduh ba khraw ia ka Jylla Meghalaya

U MP ka Lok Sabha na Shillong Constituency u Dr Ricky Syngkon ula khlad noh hynne ka janmiet sngi Palei hadien ba u kyllon kynsan ha ka por ba dang ialehkai phutbol ha Mawlai Mawiong.

Katkum ki khubor ba la ioh lum la iathuh, hadien ba u MP ula kem pang kynsan ki paralok ba ialehkai lang ki la pynkit noh mardor ia u sha Mawiong CHC hynrei namar bym don doctor ha katei ka hospital la pynkit noh sha Dr H Gordon Roberts Hospital, Jaiaw.

Na ka liang ki doctor ki la iathuh ba ki la pyrshang katba lah ban ai ka jingsumar hynrei katkum ka jingpeit ka jong ki ki la shem ba u Dr Ricky AJ Synkon ula khlad shwa ban poi ha hospital bad ki la suba jur ba ka jingkhlad u Dr Ricky ka dei na ka jingioh ia ka ‘Heart Attack’.

Ki MLA, ki MDC, ki nongialam bad ki nongkitkam ka seng VPP naduh u President u Bah Ardent M Basaiawmoit ki la wan poi mar ia ioh jingtip ba u Dr Ricky ula shitom jur bad wat ki paidbah ruh ki la wan poi sha Hospital haba ki la ioh jingtip ia kane ka jingjia ba sngewsih ba kim poi pyrkhat.

Na ka liang u Chairman ka KHADC u Bah Strong Pillar Kharjana ula ong, ba ula ioh jingtip ba u Dr Ricky ula leit ialehkai bad ula kyllon ha madan bad kiba ialehkai lang ki la rah ia u Dr Ricky sha Mawiong CHC bad hadien kane la wan kit noh sha Dr H Gordon Roberts Hospital bad kane ka jingjia ka la jia ha ka por kumba 7 baje janmiet.

Na ka liang u Myntri Rangbah ka jylla u Conrad K Sangma, ki Symbud Myntri Rangbah ka jylla u Bah Prestone Tynsong bad u Bah Sniawbhalang, u Chief Secretary ka jylla u Dr. Shakil P. Ahammed, ki heh ophisar sorkar bad kiwei ki la wan poi sha Hospital.

Ha kaba ia dei bad kane ka jingkhlad kyndit jong u Dr Ricky Synkon, na ka liang u Conrad Sangma ula ong, “Ba ka long kaba kyndit ia baroh ki nongshong shnong ka jylla bad nga lah iakynduh ia u Dr Ricky Syngkon ha kine ki ar taiew ba la dep ha Delhi bad nga dang kynmaw ia ki jingiakren ha ka por ba u wan sha ka iingsah jong nga bad ngi lah iakren shaphang ki jingthmu ki bapher kiba u don na ka bynta ka jylla bad ki jaka pule ki bapher kiba u kwah ban pynmih bad ki kam pynroi kiba bun kiba u kwah ban wanrah sha Meghalaya bad kumba 35-45 minit ngi lah iakren shaphang ka lawei jong ka jylla khlem da ngam sha ka politik bad kane ka sien ba khatduh ba ngan iakynduh bad ban iashong iakren bad u Dr Ricky Synkon. Mynta ka sngi, katba nga dang pynkhreh ban rah ia ka Mang Tyngka ha ka iingdorbar lashai ka sngi, nga la ioh ia ka khubor ba ka la don ka jingjia ba rit ba u Dr Ricky Syngkon ula kyllon ha ka por ialehkai phutbol bad ngam tip haduh katno ka jingshyrkhei kane ka jingjia bad nga lah phone ia ki ophisar ban pyntip halor ka jinglong jingman ka jong u da ka jingkyrmen ba un koit un khiah. Hynrei hadien nga lah ioh jingtip ia ka jinglong jingman bad nga lah pyntip ia ki dkhot jong ka kynhun myntri ba ngi dei ban leit mardor bad kane ka jingkhlad ka dei ka jingduh nong kaba khraw ia ka jylla bad ka jingduh kaba khraw ia ki paitbah ka rilum Khasi bad Jaintia namar ba ngi don ia u briew kum u Ricky Syngkon uba la trei borbah na ka bynta ki paitbah bad ia ka jylla baroh kawei”.

“Nga pynpaw ia ka jingsngewlem sha kiba haiing ba hasem jong u Dr Ricky Synkon bad nga duwai ha u Blei ba un ai bor ia ki bahaiing bahasem bad ia baroh ki nongkyrshan bad ki nongialam ka seng ban la ban iai shah bad kane ka jingduh kaba khraw bad nga duwai ha u Blei ba un ai ia ka jingjah thait kaba junom” ong u Conrad.

U Myntri Rangbah ula iathuh ba lashai ka sngi ka Business Advisory Committee (BAC) kan shong ia ka jingialang ka ban khlieh da u Lamphang ka iing dorbar ban shim ia ka rai, hynrei ula dep ban iakren bad u Symbud Myntri Rangbah uba khmih ia ka Parliamentary Affairs u Bah Prestone Tynsong ba kan long kaba dei eh ia ka sorkar ba kan ym iaid shakhmat ban ym pynlong ia ka dorbar lashai ka sngi kum ka jingai burom ia u Dr Ricky Synkon bad lashai ka dei ka sngi kaba ngi hap ban wanrah ia ka Mang Tyngka hynrei kan long kaba don jingmut bad ka burom lada ngi pynkynriah noh ia ka jingwanrah ia ka Mang Tyngka lashai ka sngi, hynrei ka rai kan shong ha ka BAC.

Katba u Bah Prestone ula ong, ka long ba pangnud bad kyndit halor ka jingkhlad kynsan u MP ka Lok Sabha u Dr Ricky Synkon bad u phah ia ka jingsngewlem sha kiba haiing ba hasem jong u Dr Ricky Syngkon bad u kyrmen skhem ba u Blei un ai ia ka jingjahthait kaba junom ia u shakri jong u bad un pyntngen ia kiba haiing ba hasem baroh.