Ka jingim Khristan khlem u Khrist, ka long kum ka Camera ba shondur khlem thep reel: Rev Marbaniang

Da ki phew hajar ngut ki paidbah riewngeit na ki 30 tylli ki Presbytary hapoh ka Khasi Jaintia Presbyterian (KJP) Synod Sepngi ki la tuid sha ka jingiaseng Synod Rangbah ba Arphew Saw ha Balang Presbyterian Rangskhen kaba hap ka Mawphlang Presbytery.Ia kane ka jingiaseng la ialam da u Rev. JS Thongni bad la ioh ka jingsam ia ka khubor ka ktien u Blei na u Rev WP. Marbaniang uba dei u Pastor Rangbah ka Synod na ka Mawshut Presbytary.U Rev. Marbaniang ha kane ka sngi, ula sam ia ka khubor halor ka jingstad kaba u Blei ula ai ha u Briew da kaba shim na ka ktien u Blei na ki Salm 90:12 kaba la ong “To hikai ia ngi ban niew ia ki sngi jong ngi, kumta ba ngin pynioh ha ngi ia ka dohnud ka jingstad”.U Rev.Marbaniang ula iathuh khana halor kumno u Moses u ialam ia ki khun Israel da kaba u duwai ha u Blei ban ai ia u bad ia ki briew jong u ia ka jingstad ba kynja mynsiem.

“Kumba ka ktien u Blei ka ong ba ka jingstad ka long kham kor ban ia ka ksiar ne ka rupa ne ki spah jong ka pyrthei”.Ula ong ba ki kmie ki kpa ban pynioh ia ka jingstad ia ki khun ki phah sha skul, hynrei ka ktien u Blei ha ka kitab u Job 28:12 ka ong ‘Haei yn shem ia ka jingstad bad hangno ka jaka jong ka jingshemphang”. Ha ka ktien u Blei, ka jingstad ka dei ka jingai jong u Blei ha u briew bad na ka shyntur u briew ka mih ka jingstad bad ka jingshemphang. U la ong ba u Blei ula ai kane ka jingstad ha u briew na bynta ki jingdonkam bad ka jingroi ki kor juk stad ha kine ki sngi, ka pyllong ka jingkylla dur ia kiei kiei baroh.Kane ka jingstad kaba u Blei u ai ha u Briew ka long shisha ka jingkyrkhu ia ka jingim ha kito kiba pyndonkam hok ia ka.Hynrei ka long pat ka jingjot ia kito kiba pyndonkam bakla ia ka, ong u Rev. Marbaniang.Ula ong ba u Moses haba u duwai u pan ia ka jingstad kaba kynja mynsiem, ym ka jingstad jong ka pyrthei.“Ka jingstad ba kynja mynsiem kan ialam ia ngi, ba ngin ithuh ia ka lynti ban ym iaid ha ka lynti jong u bymmman bad u riew sniew, ula ong.

U la ong ba ka jingim Khristan khristan kaba khlem u Khrist, ka long kum ka Camera kaba shondur khlem thep reel. Namar kata kum kiba ngeit u Jisu u la khot ia ngi, ka long ban pynkhreh ban iashem bad u ha kano kano ka por. Namar kane ka pyrthei ka dei tang ka ri nongwei, ka iing shongneh ka bym ju kut ka dei ha lyndet ha ki lyoh bym lah iohi kaba u Trai ula pynkhreh. Ha ki jingiaseng mynta ka sngi U Blei la ioh ruh ki jingrwai Choir na ki kynhun Balang bapher bapher ki la ai ia ki jingrwai ba sngewtynnad kum shibynta ban ialap bad iaroh ia u Trai Jisu u nongpynim ki nongpop.