Sdang ka ophis DIO ia ka National HPV Vaccination Campaign

Ban iada na ka jingpang bampong hapdeng ki riew kynthei kata ka jingpang bampong ha ki pla khun, mynta ka sngi ka ophis u District Immunization Officer Ri Bhoi District ka la pynlait paidbah ia ka jingai injek ba la tip kum ka National HPV Vaccination Campaign against Cervical Cancer.

Ia kane ka campaign, la sdang mynta ka sngi ha ka programme ba la pynlong hapoh ka ophis jong ka District Medical and Health Officer (DM&HO) ha Nongpoh, ha kaba la shimbynta naduh ki ophisar jong ka tnad ka koit ka khiah, ki longkmie bad khynnah skul ka thaiñ Nongpoh.

Haba kren maitphang halor kane ka National HPV Vaccination Campaign against Cervical Cancer, u Dr. Benjamin Laitphlang, District Immunization Officer, u la pyntip, ba kane ka dei ka sien kaba nyngkong ban pyntreikam ia kane ka dawai injeksion ban ai ia ka jingiada na ka jingpang bampong ha ki pla khun hapdeng ki riew kynthei ha baroh kawei ka ri India.

U la iathuh ruh, ba ka jingpang bampong ha ki plakhun ka dei kaba wan ba saw ha ka pyrthei baroh kawei bad kaba Ar ha ka ri India, kumta la donkam kyrkieh ban shim ia ki lad jingiada lyngba kane ka HPV Vaccination hapdeng ki riew kynthei kiba la kynjoh sha ka 14 bad hapoh 15 snem kyrta.

U Dr. Benjamin u la iathuh ruh, ba kane ka campaign kaba la sdang mynta ka 5 tarik Lber haduh 31 tarik Jymmang 2026 kumta la kyrpad ia ki kmie ki kpa, ki nongialam Shnong bad ki seng treimon sngewbha ban ai ka jingiatreilang ban pynlong ia kane ka campaign kaba jop bad la pyntip ruh ia kane ka dawai injeksion lah ban ioh tang na ki District Hospital, PHC, CHC bad State Dispensary.

Shuh shuh ruh, u la pyntip ba kito ki riew kynthei kiba angnud ban shim ia kane ka dawai ki dei ban ioh jingbit bad jingmynjur na ki kmie ki kpa bad kito kiba don ia ka jingshitom allergy ne kiba armet kim dei ban shim ia kane ka injection.

Lyngba kane ka jingsdang ia ka National HPV Vaccination Campaign against Cervical Cancer la sakhi ruh, ba arngut ki khynnah kynthei ki la shim ia kane ka dawai injeksion.