Palat T.28.49 klur sam jingiarap u MR ha ka sngi rakhe dap 8 snem ka sorkar MDA

U Myntri Rangbah ka Jylla Conrad K Sangma hynne ka sngi, ula sam ia ki Cheque ba kot T.28.49 klur na ka Green Meghalaya bad FOCUS + sha ki nongioh jingmyntoi na ki lai tylli ki C&RD Block ka East Garo Hills kiba kynthup ia ka Samanda, Songsak bad Dambo-Tongjeng ha ka jingialang jong ka jingrakhe ia ka jingdap 8 snem jong ka Sorkar synrop ‘Meghalaya Democratic Alliance’ (MDA) kaba la long ha Police Parade Ground.

U Myntri Rangbah ula ai ka jingiaroh ia ka jingkyrshan kaba la ai da ki paitbah bad ka sorkar pdeng ba ki kam pynroi kila iaid sted bad kala kiew ruh ka roi ka par bad ka ioh ka kot haduh ba ka Meghalaya kala wan baar ha ka jingkiew ka ioh ka kot hadien jongka Tamil Nadu.

“Ngi la pynlut palat ia ka T.150 klur hapoh ka FOCUS ha kine ki 5 snem kiba la leit. Ngin iai bteng ban kyrshan ia ki paidbah jong ka Jylla da kaba pynjlan ia ka por jong ka jingpynrung kyrteng khnang ba kin ioh ia ki jingmyntoi na ka FOCUS+ sa 2 snem” la ong u Conrad bad ka iathuh ba ka sorkar ka dang wad ia ki lad ban wanrah ia ki kam pynroi ha baroh ki bynta bad ka roi ka par kaba neh ha ka Jylla baroh kawei khnang ba yn lah ban kynjoh sha ka thong kaba la buh.

Katba u Myntri ka Tnad Soil & Water Conservation u Marcuise N Marak, ula ong ba hapoh ka “One Magnificient Meghalaya, Vision, 2032”, ka Meghalaya kala iohi ia ka jingkiew kaba khraw bha haba phai sha ki jingtei bad ka ioh ka kot hapoh ka jingialam jong u Myntri Rangbah u Conrad K Sangma, uba don ia ka jingiohi jngai ban pynlong ia ka Meghalaya ban kynjoh ia ka ioh ka kot kaba 16 Billion Dollar hapoh u snem 2032.