Pynshna iing ka Rotary Club ia ka longïing ha Mynthong Jowai

Kawei ka longïing ha Mynthong Jowai ka la ioh ia ka ïing thymmai ba paka hadien ba ka Rotary Club Jowai ka seng treimon sngewbha ha ka imlang sahlang bad ha ki bynta bapher ka la iarap ban pynshna ïing thymmai namar ka ïing barim ka la jot bad ka la donkam ban shna thymmai.

Kane ka longiing ka dei jong ka kong Ribil Pyrtuh ha kaba ki sah 8 ngut kynthup ki khun jong ka bad ki ksiew.

Ha ka ïing barim ki don 3 kamra hadien ba la shna pynthymmai pat ka la mih 4 kamra nalor ka jaka sum bad paiñkhana.

Ia kane ka ïing la plie da u Wailadmiki Shylla myntri ka tnat ka koit ka khiah bad tnat sports ha ka jingdonlang u President ka Rotary Club Jowai u Rtn. Rueveny Nongtdu, u Secretary u Rtn. Montri Passah, u waheh shnong Mynthong u Lamphrang Pohktai nalor kiwei pat ki dkhot ka Rotary Club bad ki dkhot ka dorbar shnong Mynthong.

Ha ka jingialang lyngkot ba la pynlong ha Community Hall ka dorbar chnong Mynthong u Rtn. Rueveny Nongtdu President Rotary Club u pynpaw jingsngewnguh ia baroh kiba don bynta ban pynjop ia kane ka kam naduh ki para dkhot bad kumjuh ki paralok jong u kumba ka phang pdeng hi jong ka Rotary International ruh ka ong “Unity For Good”.

U iathuh ba ia ka jingshna la pyndep hapoh 3 bnai kynthup ka jingshna paiñkhana ryngkat ka septic tank, nangta ka kamra sum, ka jingpynheh kamra bad pynthymmai lut baroh ka ïing.

U Wailadmiki Shylla haba kren u iaroh ia ka jingiohi jngai ka Rotary Club ban kner ki lad jingiarap namar kam dei shuh ka sien nyngkong ba ka ai jingiarap hapoh ka District bad ka Jylla.

U ong ka jinglong iatylli bad ai nuksa ia kiwei haba don shisha ka jingthrang angnud ban leh ei ei, lah beit ban pynurlong lada don ka mon ruh.

Ha ka jingiadei bad ka jingplie ia kane ka iing u ong, kiba peit nabar lehse ki lah ban kren da kaba ong ba la leh tang kawei, hynrei halor kane tang ki trai ba mad ki sngewthuh haduh katno ka dor jong ka jingioh iarap.

U khmih lynti ba nangne shakhmat kane ka club kan nanglah shuh shuh ban trei ia ki kam ai jingiarap sha ki paidbah.

Haba iathuh ia ka jingpyrshang ka sorkar ban pynbiang ia ki jingdonkam u paidbah, u ong watla katta ruh ym pat biang lut, ha kaba kum ka sor Jowai ka jingeh ba ka dang mad dei ka jaka bret ñiut bad khnang ban iasuk lang u ban jur halor ka jingdonkam naduh na iing ban pyniakhlad ia ki ñiut hapdeng kiba jhieh bad ba rkhiang ba lada leh ha kane ka rukom 50% ka jingeh ka la long lypa kaba jop.

Ha kane ka sngi u pyntip na ka bynta ka jingshna paiñkhana ki paidbah ki lah ban ioh jingiarap kumba 12000 tyngka na ka Jowai Municipal Board.