Kynnoh ka Congress ka mang tyngka ka ai jingmyntoi ia kiba don ha ka bor

U General Secretary ka Meghalaya Pradesh Congress Committee (MPCC) u Bah Manuel Badwar ula kynnoh ka jingpynlut (Capital Expenditure) ka Sorkar MDA ha ki kam pynroi kam shym la poi sha ki paidbah nongshong shnong, hynrei ka poi tang sha ki katto katne kiba don ha ka bor.

Haba kren bad ki lad pathai khubor, u Bah Manuel ula kyntu ia u paidbah ban sngewthuh ia ka jingshisha kaba jia ha ka Jylla, khamtam halor ka jinglong jingman ka ioh-ka-kot bad ka iap-ka-im ki paidbah.

U Bah Manuel u la kdew ba haka mang tyngka 2025-2026, u Myntri Rangbah ka Jylla u Conrad K Sangma u la pynbna ba ka jinglut (Capital Expenditure) ha ki kam pynroi ka la palat ia ka T.6,300 klur.

“Wat la ka Sorkar ka ioh burom halor kane ka jingkiew ka jingmang tyngka hynrei ngi dei ban peit shano kane ka pisa ka leit. Lada ka Sorkar ka shna ia ki karkhana ne ki jingshna ba heh, balei ka jingbit jingbiang kam poi sha u paidbah” la buh jingkylli u Bah Manuel.

U Bah Manuel ula ai nuksa lyngba ka tnat PWD, ha kaba u la ong ba naduh u snem 2020 haduh 2022, kumba T.760 klur la pynlut ha ki kam bapher bapher, hynrei ka bynta kaba heh tam na kane ka tyngka ka la leit tang sha kawei ka kynhun. “Kane ka pynlong ia ka spah ban sahkut tang ha kito kiba la riewspah lypa, katba u duk u nang duk bad ka jingkyrduh kam ka nangjur” u la ong.

“Wat la la ka sorkar ka ong ba ka pynlut T.2,000 klur ha ka koit khiah ha u snem 2025-2026 (kaba long kumba arshah na u snem 2020), pynban kane kam mut ba ki jingdonkam ki la kiew” u la ong.

“Ka dor ka jingshah sumar bad ki dawai dashin ka la kiew kumba 14% ka Sorkar ka lah ban pynlut arshah ka tyngka hynrei ka jingbun ki jingdonkam (kum ki ba thiah hospital) ka lah ban long kumjuh hi.”

U la ong ruh ba ka Meghalaya Economic Review kam shym la pyni ia ka jingbha ha ka rukom sumar wat la ka jingpynlut ka kiew.

Ka MPCC ka la pynpaw ia ka jingsngewkhia ba ka jingiehnoh skul (dropout rates) ka dang kiew ha kine ki snem. U Bah Manuel ula kdew ba kane ka ia dei bad ka jinglong jingman ka imlang sahlang, khamtam ba ha Meghalaya kumba 43% ki dei ki ‘Single Mothers’.

Namar ka jingbym don ka kam ka jam kaba thikna ha ki shnong (kum ka 100 sngi), kine ki kmie ki hap ban leit wad kam sha kiwei ki jaka bad ieh ia ki khun kiba hap ban iehnoh skul ban iarap ia ka iing ka sem.

U Bah Manuel ula kyntu ia ki nongpathai khubor ban pynsngew ia kine ki mat kiba ktah ia ka pule puthi, ka koit khiah, bad ka kam ka jam. U la pynkynmaw ba katkum ka Niti Aayog, kumba 27.79% (9 klur haduh 10 lak ngut) ki briew ha ka jylla ki dang duk, bad kane ka jingma lada ka sorkar kam shim khia ban pynphriang ia ka spah sha baroh, ym tang ha ki katto katne kiba don ha ka bor.