Ki longkmie ki dei hok ban ioh jingiaroh, nalor ki kam iing bad peit khun ki trei ruh na bynta ka imlang sahlang

Kum shibynta ban rakhe ïa ka sngi kyrpang jong ki Longkmie (International Women’s Day) kaba ka pyrthei baroh kawei ka ju kynmaw burom man ka 8 tarik u bnai Lber, ka Seng Kynthei Shnong Mawdiang-Um mynta ka sngi ka la pynlong ïa ka jingrakhe lypa ha Community Hall jong ka shnong Mawdiang-Um.

Ha kane ka jingïalang la wan ban sakhi lang da ka Kong Rona Khymdeit, MDC Nongpoh, kum ka kongsan ha ka jingiadonlang u Bah Linus Lyngdoh, Rangbah Shnong Mawdiang-Um, ka Kong V.S. Warjri, President ka Seng Kynthei, ka Kong Anju Lapang, Secretary bad kiwei kiwei ki nongkitkam shnong lem bad ki paidbah nongshong shnong kiba la wan ban shim bynta ha kane ka sngi kyrpang.

Ka thong jong kane ka jingrakhe ka long ban ai ka jingïaroh bad ka jingithuh ïa ka bynta ba kongsan jong ki longkmie ha ka imlang sahlang. Kumta ha kane ka sngi, ka Seng Kynthei Shnong Mawdiang-Um ka la pynkup burom da ki jaiñsem ïa ki longkmie kiba la heh bad san ha ka rta, khamtam ïa kito kiba la noh shibun ki jingshakri bad ki kam babha na ka bynta ka shnong bad ka imlang sahlang.

Haba kren ha kane ka jingïalang kum ka kongsan, ka Kong Rona Khymdeit ka la pynpaw ïa ka jingsngewnguh bad ka jingïaroh ïa ki nongialam ka Seng Kynthei kiba la shim ïa ka sienjam ban rakhe kyrpang ïa kane ka sngi bad ban pynkup burom ïa ki longkmie kiba la noh mynsiem bad trei shitom na ka bynta ka shnong.

Ka Kong Rona ka la ong ruh ba ki longkmie ki dei hok ban ïoh ïa ka jingïaroh bad ka jingithuh na ka bynta ka jingtrei shitom jong ki, namar bun na ki kam kiba ki pyndep la ka long ha ka kam iing kam sem, ka jingpynheh pynsan ïa ki khun ki kti, lane ha ki kam paidbah ha ka imlang sahlang ki long kiba kordor bad kiba shongdor hynrei bunsien kim ju ïoh ïa ka jingsiew ne ka jingïaroh kaba biang.

Shuh shuh ka la kyntu ïa ki kynthei ban nang trei shitom bad ban long kiba trei shitrhem ha ki kam shnong bad ha ka roi ka par jong ka imlang sahlang, da kaba pynpaw ba ka bynta jong ki kynthei ka long kaba kongsan eh ha ka jingtei ïa ka lawei kaba bha.