Maham ka shnong Umblai ia ki nongwankai ban ym kynthih na jingkieng

Ki nongialam shnong Umblai ka la maham ia ki nongwan kai ha jingkieng kongkhen, ba kim dei ban kynthih ban ryngkoh sha pung namar ba ka long kaba jrong kumba 120 phut bad ki thwei ruh kiba jylliew bha.U Sordar ka Umblai u bah Jlen Sohtun ula kyntu ruh ia ki nongwan shangkai ha jingkieng Kongkhen ba kim dei ban ia iaid bun ngut ha kane ka jingkieng namar ba kane ka jingkieng ka long kaba la rim bha, khlem pat don ka jingmaramot.Katkum ka jingong u bah Sohtun, kane ka jingkieng doi doi ha kongkhen kadei kaba la shna naduh u snem 1952 bad la kyntu ia ki nongwankai ba ha shwa ba kin wan ha kane ka jaka kidei ban pyntip shwa ne pan jingbit na ka shnong khnang ban lait na kano kano ka jingjia ba sngewsih.

U Sordar ula pynpaw ka jingsngewkhia namar ba ka shnong kam don pisa ban maramot ia kane ka jingkieng bad u nongmihkhmat ruh um lah ban pynioh jingiarap na ka sorkar. Namarkata ka shnong ka la kyrpad ia ki briew kiba wankai ba kidei ban bud ia ki kyndon ba la bthah ka shnong khnang ban lait na ka jingsngewsih bad ka jingma.Ha kajuh ka por na ka liang jong u Secretary ka Umblai u bah Kupar Sohtun, u la ong ba ka shnong ka sngew khia haba iohi ia kiba wan jngohkai kiba kynthih najrong jingkieng Kongkhen sha thwei kaba jrong, kaba lah ban buh jingma.

Hadien ba la iohi ia ki video ba ki nongwankai ki leh thurmur da kaba kynthih bad ryngkoh sha pung, u Secretary ula ong ba kane ka lah ban buh jingma, watla ki lah ban don ki syrnod ba kila tbit ha kane ka kam hynrei na ka liang ka shnong ka la buh ia ki kyndon khnang ba kiba wankai kin iohi bad bud ryntih.