Pynsangeh u MR ia ka ilekshon MDC, namar u tip ki paidbah kim kyrshan NPP

U nongialam ka Hynniewtrep Youth Council (HYC) u bah Roy Kupar Synrem, u la ong ba ka jingpynsahngeh syndet jong u Myntri Rangbah ia ka ilekshon ka Garo Hills Autonomous District Council (GHADC) ka dei namar ba u tip ba ki paidbah Garo kin ym ai ka jingkyrshan ia ka NPP ha kane ka ilekshon.

Ia kane u bah Roy ula ong ha ka jingialang paidbah ba la khot pyllong da ka Confederation of Meghalaya Social Organisation (CoMSO) hynne ka sngi ha Motphran, ban kyrshan ia ka jingdawa ki paralok Garo ban khanglad ia bym dei riewlum ban iakhun ia ka ilekshon MDC sha GHADC.

Haba kren ha ka jingialang, u bah Roy ula ong ba kane ka jingialang ka long ban pyni ba ki paidbah Hynniewtrep ki ai ka jingkyrshan ia ki paidbah Garo kiba ieng pyrshah ia ki bar jylla kiba rung beain bad kiba iakhun pyrshah ia ka hok longtrai jong ki ha District Council.

“Ka jingpynkynriah ia ka ilekshon GHADC, kadei namar ba u Conrad utip ba ki paidbah Garo kin ym kyrshan ia ka NPP ha kane ka ilekshon. Namarkata ula hap ban shim ia ka rai ban pynbiej biang ia ki paidbah Garo”, ong u bah Roy.

Ula ther tyngeh ia u Conrad Sangma bad baroh ki nongialam ha Garo Hills, kiba la shu pyndonkam ia ki paidbah Garo ha ki 50 snem tang namar ka Vote Bank Politiks jong ki.

“Ki paidbah Khasi-Jaintia bad Garo, kin ym ailad ia u Conrad Sangma ne ka party jong u, ban die ia ka jaka jong ki paidbah riewlum Garo,” ula ong.

U bah Roy ula ong ba ka jingnud ki mynder ban beh ia ki trai ri na ka shnong jong ki, kadei namar ba ki nongsynshar ki ailad ia ki.

“ Tang namar ban jop ia ka ilekshon, ban ioh synshar ban ialam ia ka sorkar, ki paidbah Garo ki hap ban ieh ia la ka jaka puta,” ong u bah Roy.

Ula ong ba ki paidbah ki la wanrah ia u ha ka shuki Myntri Rangbah bad ki la jied ia ki nongmihkhmat, hynrei kane ka sorkar ka la wanrah tang ki kam pynroi, katba ia ka hok longtrai la shah knieh.

Lada ki mynder mynta ki knieh ia ka hok longtrai, ka khyndew ka shyiap, ka hok synshar khaddar ha Garo Hills, kan sa poi ka por ba kine ki juh ki briew kin sa knieh ia ka hok jong u Hynniewtrep. Namarkata kane ka long ka jingpyndit ia ki paidbah Hynniewtrep ba kin long kiba husiar.

Ula ai mynsiem ia ki paidbah Garo ba kim dei ban duh jingkyrmen namar ba ki Khasi-Jaintia kin ieng lang ban iakhun pyrshah ia ki bar jylla kiba thmu ban wan klun ia kane ka ri.

“Ki mynder kim donhok ban shong ha ki dorbar trai ri, ym donhok ban shong ban long nongthaw ain ha ki District Council. Lada donkam ban iamih ngin iamih ban pyntikna ba ki dorbar trai ri kidei ban neh ha ka kti jong ngi,” ula bynrap.