Pynjlan ka sorkar 6 bnai ia ka samoi treikam GHADC, shimti u Dhormonath Sangma kum u CEM thymmai

Ka kynhun Myntri hynne ka sngi ka la mynjur ban pynjlan ia ka samoi treikam ka Garo Hills Autonomous District Council (GHADC) sha ka 6 bnai.Ka jingpynjlan ia ka samoi treikam kan sdang naduh 18 tarik Iaiong haduh 18 tarik Risaw 2026.Ia kane la pynbna da u Symbud Myntri Rangbah ba peit ia ka tnat District Council Affairs (DCA) u Bah Prestone Tynsong bad ula ong, kane ka jingpynlan kan ailad ia ka GHADC ban leh ia kaba donkam halor ki jingjia ba la mih namar ka ilekshon MDC.

U Bah Prestone ula ong, ka jingpynlan ia ka samoi treikam ka Executive Committee (EC) bathymmai bad ka sorkar Jylla kin hap ban shong bad bishar bniah ia ka jingdawa ki paidbah ka rilum Garo kata ban nym shah ia ki bym dei riewlum ban iakhun ne thep Vote ha ka ilekshon GHADC.”Ka Sorkar ka la pynjlan ia ka samoi treikam ka GHADC, mynta ngi ieh ha ka jingstad ka Excutive Committee bathymmai ban leh ia kaba donkam halor ka mat ba donkam syrnod Schedule Tribe ban iakhun ilekshon MDC sha GHADC” la ong u Bah Prestone.

Ka rai ka la mih hadien ba u Albinush R Marak ula hiar shuki kum u Chief Executive Member (CEM) GHADC lyngba ka no-confidence motion ba la wanrah da ki 21 ngut ki MDC ka Council.Ha ka juh ka sngi, u MDC ka Naguapra constituency u Dhormonath Ch Sangma ula shah jied kum u Chief Executive Member (CEM) ba thymmai ka Garo Hills Autonomous District Council (GHADC).