Da ka ‘Mission 1000’ buh thong ka sorkar ban ioh ia ki jingbam tei met

U Myntri Rangbah ka Jylla Conrad K Sangma hynne ka sngi ula pynlait paidbah ia ka Mission 1000, ka prokram ban pynduh jait ia ka jingduna ka jingioh ki jingbam tei met bad pang swai hapdeng ki khynnah ha Meghalaya.Ia ka Mission 1000 u Conrad ula pyllait haba plie ia ka tamasa bam lane ka Culinary Cascade 2026 ha Nan Polok Shillong.Ka Mission 1000 kan phai khmat ha ka jingpeit thuh ia man ki khynnah naduh ba dang kha ban ioh ia ki jingbam tei met, bad ka jingpyndonkam ia ki technology na ka bynta ka jingpeit bniah ba khlem sangeh.Haba kren ha kane ka sngi u Conrad ula ong, “Haba ngi lehkmen halor ka bam, Nga kwah ban leh eiei halor kane ka kam kaba nga kwah eh ban leh naduh ka mynsiem. Ka Jylla jong ngi ka mad shibun ki jingeh ha ka koit ka khiah, ka pule dangle bad ka jingbam tei met. Ka jingduna ka jingioh ia ki jingbam tei met bad pang swai hapdeng ki khynnah ka dang long ka jingsngewkhia kaba jur”.“Ban tehlakam ia kane, Ngan pynlait paidbah ia ka Mission 1000, ka prokram ba la buh thong ban pynduh jait ia ka jingduna ka jingioh bam tei met bad pang swai ha Meghalaya” ula bynrap.

U Conrad ula batai bniah da kaba ong, “Nga pyrkhat ban pyniasoh ia kane ka thong bad ki marbam mardih jong ka thain. Ki nongshet jingshet, ki restaurant bad ki hotel jong ngi ki lah ban shim ia ki shnong ne ki distrik, ban kyntiew ia ki jingbam ba la thaw hi ha ka thain, ki jingbam tei met bad ban thaw ia ki prokram kynthup ia ki shnong ki thaw bad ki jingthmu jong ka CSR. Da kaba pyniasoh ia kane bad ka Culinary Cascade, ngi lah ban leh ia kane ka jingtynjuh ba mad da ka imlang sahlang haba ngi lehkmen ia la ka jong ka kolshor bad ka bam ka dih”.Kane ka tamasa ba ar sngi la pynlong halor ka matpdeng “Crafted for all 5 Senses”, la pynlong ha ka 27-28 tarik 2026 bad la pyniaid ia ka da ka Tnad Tourism ka Sorkar Jylla ha ryngkat ka jingiatreilang bad ka Meghalayan Age Ltd, MyMeG bad ka Chief Minister’s Meghalaya Grassroots Music Program.Haba ai jingkren, u Myntri Rangbah ula ai khublei ia ka Tnad Tourism ba ka pynlong ia kane ka tamasa.U la ong, “Ha kine ki lai snem ba la leit, ka tamasa ka la nangitynnad shuh shuh bad ka la nang plie lad ia ki nongshet jingbam, ki kynhun ba don bynta ha kane ka kam bad kham kongsan ia ki samla ka Jylla ba itynnad jong ngi”.

Haba batai bniah ia ka jingshim khia ka Sorkar ia ki tamasa, ula ong, “Ngim shym la leh ia kiei kiei kiba thymmai, hynrei bun na kine ki tamasa ki la don ha ki snem ba la leit noh hynrei ngi la pynjanai shuh shuh sha ka kam biang bad kyrmen kin iaid bteng man u snem. Ha kine ki phra snem ba la leit, ka Meghalaya ka la buh ia ka buit treikam ba shai ha ka liang ka kam jngohkai ban pyni sha ka pyrthei ia kaba bha tam bad pynbeit ryntih na bynta ban tei ia ka jingmut jingpyrkhat ha ka jingim”.U Myntri Rangbah ula ong, mynta ka janmiet nga la plie ia ka Indian Sailing League banyngkong eh ha Umiam ba la wan shim bynta da 182 ngut ki nongking lieng na ki 8 tylli ki ri bad 14 tylli ki kynhun ban pynlong kum kawei na ki jingiakop king lieng ba heh ha India. Dang khyndiat sngi, ngi la plie ia ka Shillong International Film Festival banyngkong kaba wanrah ia ki nongshna phlim bad ki artist na kylleng ka Ri. Ka kynhun nongrwai ka ri Bilat Def Leppard ka dang shu dep tem dang shen bad mynta ka miet, u Russel Peter un pynbyrngia ia ki paidbah ha Shillong”. Kiwei pat kiba la ai jingkren ki kynthup ia u Vijay Kumar D., IAS, Commissioner and Secretary, ka Tnad Tourism, u Chef Ahmedaki Laloo, Festival Curator na ka A’ Origins bad kiwei kiwei.