Ban khanglad ia ki Party heh na Ri thor wer u bah Metbah ia ki seng riewlum ban iatylli kawei

U President ka United Democratic Party (NPP) u Bah Metbah Lyngdoh ula ban jur ba donkam ka jingiatylli ki sengsain pyrthei riewlum (Regional Party) ha Jylla ban khanglad na ka jingwan tyllep ki seng heh ne National Party na ri thor.

Ïa kane u Bah Metbah ula ong, halor ka jingkiew ka BJP kaba la jop dang shen ha ka ilekshon ha West Bengal bad Assam nalor ka jingwan iasoh ki MLA na kiwei ki sengsain pyrthei ha Meghalaya sha ka NPP.

Haba kren sha ki lad pathai khubor u Bah Metbah ula ong, “Hoid ka jingmih jong kano kano ka seng sain pyrthei ka don beit, kham mynshuwa ka Congress, TMC bad mynta ka BJP bad kiwei. Ha Meghalaya ka don ka BJP bad ka don 2 ngut ki MLA bad ka BJP ne kiwei ki National Party ruh ki don ia ka hok ban wan bad pan jingkyrshan na ki paidbah ka Jylla”.

U Bah Metbah ula ong, kum u President ka UDP ka seng sain pyrthei riewlum barim ha jyla, ula ju pynsngew bad wer ia ki sengsain pyrthei riewlum ha jylla ban iatylli hapoh ka kawei ka lama.

“Nga la ju pynksan na ka por sha ka por, da kaba khot ia kiwei ki seng sain pyrthei riewlum ban wan shakhmat ha kajuh ka rynsan kum ngi don mynta ka Regional Democratic Alliance (RDA) hapdeng ka UDP HSPDP” ula ong.

U Bah Metbah ula ong, ka jingseng ia ka RDA ha ki snem ba la dep ka dei ka jingangnud ki paidbah ka Jylla namar ka Jylla kaba rit paid ngi donkam ia ka jingiatylli kawei.

Ula ong ki National Party kim dei kiba sniew ki buh jingma ia ki seng sain pyrthei riewlum hynrei ki National Party ki peit ia ki mat jong ka ri baroh kawei katba ki Regional Party ki peit ia ki mat ba donkam ka Jylla.