Hadien 32 snem khlong biang ia ka met ka Syiemsad Iartimai,ban pyndep ka jinglehniam katkum ka riti ka Hima Sohra

Da ki hajar ngut ki khun ki hajar, ki paidbah kiba wan na kylleng ki jaka khamtam na ka longiing syiem ryngkat ki myntri, kiba khraw jong ka Hima ha ka sngi Saitjain ki la sakhi ia ka jingthang ia ka met ba sah jong ka Syiemsad Iartimai Syiem hadien 32 snem kynthih.Ia ka jingpynkhuid ia ka met basah jong ka Syiemsad Iartimai la leh da ka longiing ka Syiem Hima Sohra ha lum jingthang ha Sohra ha ryngkat ka leh niam leh rukom katkum ka riti dustur.Ka Syiemsad Iartimai ka la khlad ha u snem 1994 bad ha kine ki 32 snem la shu tep kynrong ia ka Syiemsad hadien ba la ap ban pyndep ia ka niam ka rukom kaba la pyndep ha kane ka sngi Saitjain katkum ka niam ka rukom, ka riti ka dustur kumba ju long ha ka Hima. Ha shwa ban leit sei na lum jingtep ia ka met ka Syiemsad Iartimai, la pyllong ia ka jingialang ha iingsyiem ha Nongrim, Sohra ha kaba la ioh ia ka jingkren na u Marremdor Syiem, uba la jied ka Hima Sohra kum u Syiem watla ka KHADC kam pat ai sanad, ka Syiemsad ka Meiiem Cosltymai Syiem, ryngkat ki myntri bad kiba khraw batri bad ki khun ki hajar.

Haba kren ha kane ka sngi, ka Syiemsad Costlymai ka la ong ba mynta ka sngi, ka dei kaba sngew kmen ha kawei ka rukom bad kaba sngewsih ha kawei ka bynta.Ka Syiemsad Costlymai ka la iathuh ba ia ka Syiemsad Iartimai kaba dei ka kmie jong ka, la thmu ban pynkhuid ia ka met ha u bnai Nohprah, 2025 hynrei ka la wan ka jingshaiong ha iing hasem namar ba khlad noh u Syiem Rangbah u Paiem Freeman Syiem. Dei namar kane ka daw ba la pyllong ia ki ban khreh ban slem ban pynkhuid ia ka met basah jong ka Syiemsad Iartimai.“Ka kmie jong ngi la 32 snem ka shong khim shong jynjar hapoh kut u Lum bad mynta kan ioh ban mih noh ban leit phai noh sha ka jaka shnongneh jong ka bad mynta kan ioh ia la ka burom,” ong ka Syiemsad Costlymai. Ha kane ka sngi la ioh ruh ia ka jingkren na u Marremdor Syiem uba la pynpaw ia ka jingkmen ban lah ban pyndep ia kane ka jingleh niam ban pynkhuid ia ka met ka mei ieid Syiemsad Iartimai Syiem hadien 32 snem tam mynta katkum ka riti ka dustur ka Hima.

Na iing la rah ia ka lyngkhason sha jaka ba tep kyngrong ia ka syiemsad bad hadien ba la sei ia ka shyieng, ki sa rah pat ban leit thang ka jaka kaba la pynkhreh ban aiti ha ka syiem ding, ban pynkhuid ia ka pyut ka lyer. La pyllong ia kane ka jingpynkhuid ia ka met jongka Syiemsad ryngkat ka niam ka rukom bad ka kren ka khana na u riew tymmen riewsan. Lynti arted naduh ka iing syiem na Dong Nongrim Sohra, la pynbud da ka sur jingtem na ka Raid Mawshuit katba dang rah ia ka lyngkhason haduh ban aiti ha ka syiem ding ha kpep thang.