Ïoh um ki 206 ïing ha shnong Mookaswan na ka shim JJM ba T.4 klur

Ka shnong Mookaswan, West Jaiñtia Hills District ha ka jingialang plie paidbah ia ka skhim umbam umdih ne ka Combine Water Supply Scheme ba la shna hapoh  ka skhim JJM ha ka 20/12/24 ki la pynpaw ka jingkmen bakhraw namar ba mynta ki la lait na ka jingkhie step  ban leit iaknieh um ha ka por tlang. Ia kane ka skhim umdih jong ki la shna ha ka mang tyngka ba 4 klur tam bad ka pynpoi um sha 206 tylli ki longiing ba kynthup 163 iing ha Mookaswan bad  43 iing ha Lad Mynkseh

La wan ban plie paidbah ia kane ka skhim da u MLA ka thaiñ u Wailadmiki Shylla uba long ruh u Chairman ka MUDA, u Ailad Bhoi MDC ka thaiñ, ka R Kynjing E.E. PHE RWS Jowai Division, u J. Suchiang JE PHE, ki nongshong shnong ka Mookaswan Ladmynkseh bad kiwi. U Wailadmiki Shylla haba kren u sngewkmen ia ka jingjop kane ka skhim umdih namar dei kawei  na ki mat ha ka por ba u sdang wan ialap election ha kane ka shnong, ki longkmie ki ong ia u ba ka  umbam umdih dei kaba hakhmat eh.

Nangta nalor ba u pynsngew ruh ia kiwei pat ki skhim pynroi ban sa wanrah shen ha kane shnong, u buh ruh ka jingkyntu ia ki paidbah nongshong shnong ban pyndonkam hok ia kino kino ki jingiarap ba ioh na ka sorkar namar ki dei na ka bynta ka jingmyntoi jong ki hi. Ha kajuh ka por u bynrap halor ka jingdonkam ka khuid ka suba da ka ban leh ei ei ia ki shnong.