Ithuh ka sorkar India ia ka Shillong Medical Kolej, shen yn wan plie u Myntri Rangbahduh

Ka Myntri ka tnad ka koit ka khiah ka sorkar jylla ka kong M. Ampareen Lyngdoh, ka la pynpaw ia ka jingsngewkmen namar ba ka jingangnud ka jylla da ki phew snem ban don noh ia ka Shillong Medical College (SMC) mynta ka la lah ban urlong, hadien ba ka la ioh ia ka jingithuh na ka National Medical Commission.Haba kren sha ki lad pathai khubor ka kong Ampareen, ka la ong ba ia ka SMC yn sdang mynta u snem ha kaba u Myntri Rangbahduh ka ri un wan ban plie ia kane ka kolej ha u bnai Nailur, 2025. Ka Myntri ka tnad ka koit ka khiah ka la iathuh ba mynta ba dang sdang, yn shim shwa 50 ngut ki khynnah ban pule ha kaba 85 percent ka bhah yn iaid sha ki samla pule ka jylla bad 15 percent la bhah na bynta ki samla ka ri India.

“Mynta ka sngi ngi la ioh ia ka jingpynbna ba ka National Medical Commission, ka sorkar India ka la ithuh ia ka SMC kum kawei na ki Medical College bad mynta ka la don ha ka thup jong baroh kawei ka ri,” ong ka kong Ampareen. Ka Myntri ka la ong ba ka sorkar ka la pynkhreh ia ki doctor bad la thung ia ka Dr. Nicola Lyngdoh Iangrai kum ka Director ka SMC kaba dei ka Surgeon jong ka ENT hapoh ka RIIMS, Imphal. “Hadien ka jingpyrshang kaba shitom bha, ngi la ioh ia kane ka Medical College, watla haba sdang ngin iakynduh hi ia ki jingeh hynrei kaba nga itynnad bad kaba sngewkmen ka long ba ngi la don ia ki doktor na kane ka jylla kiba la wanphai ha la ka jylla ban trei ha ka SMC . Kane kan long ruh kum ka jingplie lad ia ki doktor na kane ka jylla ba kin pyntbit shuh shuh na bynta ban ai ka jingshakri kaba paka sha ki paidbah bad ki samla ruh kiba don jingthmu ban pule ban pyndep ia ka jingpule ha ka MBBS ki la lah ban pule ha ka jylla lajong mynta,” ong ka kong Ampareen.

Katkum ka jingong ka Myntri, ka sorkar ka la pynbiang lut nadong shadong kynthup naduh ki kamra klas, ki Laboratory, ki jaka sah ki professor, ki nonghikai nalor kiwei de. Ka la iathuh ba ka jinglut jingsep ban pule ha SMC ka long T. 30,000 man u snem bad kane kan kynthup lut naduh dong shadong naduh ka bai sah.