Ka jingpynkoit ia kiba pang da ka sur jingrwai bad pyndeng sati

Kawei ka shnong Sohliya kaba don ha them Bhoi ka don ka rukom duwai phirat kaba khampher ban pynkoit ia kiba pang ba shitom kumba ju long naduh mynshwa. Ia kane ka rukom duwai la khot ka Arnan Kehang ha ka ktien Karbi, kaba mut Pyndeng sati. Ka rukom duwai ka long da ka sur jingrwai ha kaba lada don kiba pang ki bym ioh ia ka jingkoit wat haba ki leit shah sumar nangno nangno, ki sa pyntip noh sha u Lyngdoh uban lum ban lang ban pyllong ia ka jingduwai. Kin hap ban wanrah ryngkat ia ki klong ki skaw, ka kyiad u khaw bad kiwei katkum ka jingdonkam. Ha ka jingiakren bad u Lyngdoh u bah Starvis Ronghang, u la batai ba ia kum kane ka jingduwai, la pynlong haba don mano mano ba pang ba shitom haba kim ioh jingkoit nangno nangno.

“Ia ka jingpynkoit la leh tang da kaba shu rwai ia ki jait tiar kiba pyndonkam, kum ka jingrwai ia ka doh, ka jingrwai ia u klong, ka dohkha, ne kano kano katkum ka jingrwai kaba dei ha ka jingleh niam jong ki,” la iathuh u bah Starvis. Katkum ka jingiathuh u Lyngdoh u bah Starvis, la pynlong ia kane ka jingduwai ban don lang u kni trai bad ka kmia bad kiba haiing hasem baroh. Ha kane ka jingduwai, ki pyndeng sati sha ki nongpang hadien ba la dep duwai. Ka jingleh niam duwai ka long baroh shimiet bad kum lashai pat kin sa pyndeng ka sati ia kiba pang ba kin ioh ia ka jingkoit.

U bah Starvis ula ong ba ki don 3 jait ki rukom duwai ba kynthup ka jingai da ka ja kaba la khem bha, kawei pat ka long ka jingai Sati bad kaba khadduh ka dei ka jingpom ia u blang.U la ong ba kito kiba la kylla niam ruh ki lah ban leh lada ki mon ban leh kumta katkum ka niam tynrai. “Kum ia kane ka jingduwai, la pyllong tang haba don ba shitom kiba donkam ban duwai katkum ka niam tynrai,” ong u bah Starvis.