Ka Seng Khasi Ri-War Mihngi ka Lahduh ha ka rynsan ïakob jingkyntip

Ka kynhun ki samla ka Seng Khasi Ri-War Mihngi,  ki la long ki lahduh ha ka rynsan ïakop jingkyntip (Inter Tnat Seng Quiz Competition) jong ki tnat Seng Khasi, ïa kaba la pynlong ïa ka da ka Literary Committee jong ka Seng Khasi Kmie, kaba la long ha Auditorium Hall jong ka Seng Khasi Higher Secondary School, Jaiaw, Shillong, hynnin ka sngi Saitjain, ka 23 tarik Nailar 2025 Kane ka jingïakob ka long kum shi bynta jong ka jingrakhe ka Seng Khasi Kmie ia u Mawmer jong ka jingdap ba 125 snem pura jong ka Seng.

Ha kane ka kynti, ïa ka tnat Seng Khasi Ri War la mihkhmat da Wandarilin Thabah bad Babiang Suting. Ka   kynhun kaba wan ban bat ïa ka kyrdan kaba ar dei ka tnat Seng Khasi Malki ba la mihkhmat da Barijuban Lyngdoh bad Saphira Kharmalki. Katba ka tnat seng kaba la wan ban bat ïa ka kyrdan kaba lai dei Seng Khasi Pyntorumkhrah, ba la mihkhmat da Rangsankuparbok Majaw bad Shristi Rani. Ïa kane ka ai nam ai burom ha ka kyrteng jong u Rangbah D.K. Dkhar (Bam kwai ha dwar u Blei), ba dei u President barim ka Seng Khasi Kmie, ha kaba ki khun ki kti jong une u rangbah, ki la wan shakhmat ba kin ai ïa ka jingkyrshan bad ban ïa skahi lang ïa kane ka prokram.

Nalor katta la wan ruh ban sakhi lang da Presdient bad General secretary ka Seng Khasi Kmie, Rgh O. Pyngrope bad  Rgh Hainess Marbaniang, nangta ki vice presdent, ki dkhot ka Seng Khasi Kmie ryngkat ka Seng Kynthei bad Seng Samla Seng Khasi Kmie bad kiwei ruh ki para riew seng na ki wei pat ki tnat. La ïoh ïa ka jingkren maitphang na u Rgh Dipshon Lyngdoh Nongbri, Vice President bad Chairman, Literary Committee, Seng Khasi Kmie bad la pynïaid ïa ka jingïalang  bad ïa ki kyntien ai khublei  la ai da  I Dr. Badarishisha Kharwanlang, Secretary, Literary Committee, Seng Khasi Kmie. Ïa kane ka Inter Tnat Seng Quiz Competition la pynïaid da ka Literary Committee, Seng Khasi Kmie bad la sam ïa ka song pisa, trophy bad medal sha ki nongjop da ki khun u u Rangbah D.K. Dkhar (BKHDB), bad ki nongïalam jong ka Seng Khasi Kmie.